WAKULIMA WA ZABIBU MAMBO BAM BAM

Imetumwa : November 14th, 2024

Na.Sizah Kangalawe 

Habari- Dodoma Rs

Baraza la Biashara la Mkoa wa Dodoma lenye dhima ya kuangalia, kujadili na kuandaa mipango mikakati mbalimbali ya kukuza Biashara Mkoani Dodoma, limefanyika Novemba 14/ 2024 ikiwa  ni baraza la kwanza katika mwaka wa Fedha wa 2024/2025.

Kikao kazi cha Baraza hilo kimefanyika katika ukumbi wa Mikutano wa Ofisi ya Mkuu wa Mkoa Jengo la Mkapa ambapo Mkuu wa Mkoa wa Dodoma Mhe. Rosemary Senyamule amepata wasaa wa kuwasihi wafanyabiashara na wawekezaji wa Mkoa huu kuwekeza katika biashara ya malazi na chakula hususani katika maeneo ya pembezoni mwa Stesheni ya Mwendokasi iliyopo Mkonze Jijini Dodoma.

‘’Tangu Treni imeanza kufanya kazi watu zaidi ya 3000 wanaingia  Dodoma kila siku ndio waende Mikoa mingine, nyie wafanyabiashara tumieni fursa ya kujenga mahoteli, lodge na Migahawa kwasababu uhitaji wa huduma hizo kwa maeneo yale ni mkubwa na bado watu hawajatumia fursa hiyo vizuri.

Aidha Mhe. Senyamule ameweka bayana uwepo wa soko zuri la zabibu lililosababisha kuwaondoa wakulima katika kadhia ya zao hilo adhimu kuharibikia mashambani kutokana na kukosa masoko.

‘’Miaka miwili nyuma tulikuwa na viwanda visivyozidi 8 vya Zabibu lakini leo tunapoongea tuna viwanda zaidi ya 38 vya kuongeza thamani ya  zabibu, nyie ni mashahidi mwaka huu hatujapata mtu wa kulalamika zabibu zimeoza shambani lakini nasikia watu wanaosema zabibu hazitoshelezi kutokana na kukua kwa mahitaji ya zao hili.

Kupitia vikao hivi tuangalie namna ya kuongeza uzalishaji kwasababu watu wamegundua kuwekeza sio lazima uwe na kiwanda kikubwa ila kupitia viwanda vidogo vidogo inawezekana na inaleta tija kwa wakulima’’, amesema Senyamule

Kwa upande wake katibu mtendaji wa Jumuiya ya Wafanyabiashara Tanzania- Dodoma Bw. Alexander Mallya ameiomba Serikali kuweka katika kapu moja ushuru na tozo mbalimbali wanazotakiwa kuzilipa  ili kuepusha usumbufu mdogo mdogo unaotokana na kufuatwa na maafisa wa serikali wanaofanya kazi ya kukusanya tozo na ushuru huo kwenda kwa nyakati tofauti.

Hatahivyo kwa mujibu wa Kituo cha Uwekezaji Nchini (TIC) tangu Mwaka 1987 - 2024, Miradi ya uwekezaji zaidi   ya 210 imetekekelezwa katika Mkoa wa Dodoma na kusababisha  ajira 28,703 kwa wakazi na wananchi wa Mkoa huu.

#dodomafahariyawatanzania

#dodomatupotayarikupigakura

#kurayakosautiyako

#mtiwangubirthdayyangu