WALIMU SIMAMIENI WANAFUNZI KUTUMIA MAKTABA MHE SENYAMULE

Imetumwa : January 24th, 2024

Wito umetolewa kwa walimu wa shule ya sekondari Mnadani kuwaelekeza wanafunzi namna nzuri ya kutumia Maktaba ili kupata matunda mazuri kwenye matokeo ya mitihani ya mwisho.

 Hayo yameelezwa na Mkuu wa Mkoa wa Dodoma Mhe. Rosemary Senyamule, Leo Januari 24, 2024 alipokua akizindua Maktaba ya kujisomea iliyojengwa na Taasisi ya Genesis for Children Organization kwenye shule ya sekondari Mnadani inayopatikana kwenye Halmashauri ya Jiji la Dodoma.

Mhe. Senyamule amesisitiza kuwa uwepo wa Maktaba hiyo uwe chachu kwa wanafunzi kusoma kwa bidii na kuongeza maarifa na utashi.

"Suala la shule linahusisha wadau pia na si Serikali peke yake ndio maana Genesis wameliona hilo. Mkoa wa Dodoma una shule za Sekondari 250. Dodoma Jiji ina shule 42 lakini kati ya hizo ni shule 9 tu ndizo zina Maktaba kwa ajili ya wanafunzi kujisomea na kujifunzia. Hongera kwa shule ya Mnadani kupata bahati hii ya kuwa shule ya pili kupata Maktaba.

"Nitoe Wito kwa walimu kuwasaidia wanafunzi waweze kutumia vizuri Maktaba hii ili kupata ujuzi, maarifa na utashi kwani Serikali imefanya uwekezaji Mkubwa kwenye sekta ya Elimu na Genesis wametusaidia pia. Natarajia kuona matokeo mazuri kwa kidato cha 4 mwaka huu kwani ninaamini hayatofanana na ya mwaka jana kama ambavyo Genesis wanashuhudia kupitia matokeo ya shule ya kwanza kujenga Maktaba kama hii" Mhe. Senyamule 

Nae Mkuu wa Wilaya ya Dodoma Jiji Mhe. Jabir Shekimweri amesema uwepo wa Maktaba hiyo utasaidia wanafunzi kufanya rejea ya vitabu vya ziada na kiada. Hii inajenga uzalendo kwa watoto kufahamu kazi kubwa inayofanywa na Serikali yao kupitia kusoma magazeti na machapisho mbalimbali yanayohofadhiwa hapo.

Kadhalika, Mkurungenzi wa Genesis Bi. Irene Kitoti wakati akisoma hotuba yake mbele ya mgeni rasmi, amesema Maktaba hiyo ni ya pili kujengwa kwa Tanzania Bara tangu kuanza kwa mradi na imegharimu kiasi cha shilingi Milioni 18.9 . Ameongeza kuwa Maktaba hiyo itafungua ufahamu wa wanafunzi na kitimiza malengo yao.

Taasisi ya Genesis for Children Organization ilianza rasmi mwaka 2022 na ilipata usajili tarehe 10/05/2023 ikiwa na lengo la kuchangia ukuaji wa Elimu kwa ngazi ya msingi na sekondari kwa kujenga Maktaba zitakazosaidia wanafunzi kujisomea na kujifunzia kwa kupata kibali kutoka Ofisi ya Rais TAMISEMI na mpaka sasa wameshajenga Maktaba 3, 2 Tanzania Bara na 1 Visiwani Zanzibar.

ReplyForward Add reaction