WALIMU WATAKIWA KUWA MFANO KWA JAMII KWA KUTIMIZA WAJIBU WAO

Imetumwa : April 22nd, 2025

Na. Hellen M. Minja

       Habari – DODOMA RS

Serikali ina matamanio makubwa ya kuona Walimu wanaendelea kuwa mfano kwa jamii inayowazunguka katika kutimiza wajibu wao wa msingi sambamba na majukumu mengine yanayoambatana na wajibu huo hususan kwenye masuala ya kusimamia Amani na Utulivu.

Mkuu wa Mkoa wa Dodoma Mhe. Rosemary Senyamule ameyasema hayo wakati wa zoezi la uchaguzi wa Viongozi wapya wa Chama cha Walimu (CWT) Mkoa wa Dodoma watakao hudumu kwa kipindi cha miaka mitano (2025-2030) lililofanyika kwenye ukumbi wa shule ya Sekondari ya Dodoma Aprili 22, 2025.

“Ni matamanio yetu sisi kama Serikali lakini matamanio ya Mkoa wa Dodoma kuona kuwa Walimu mnaendelea kutimiza wajibu wenu mkubwa wa msingi lakini mnaendelea kutimiza majukumu mengine kama mnavyopewa na muajiri wenu ambayo mnakua mkiyafanya wakati wote lakini pia, tunaendelea kutamani kuona walimu wanaendelea kuwa mfano bora katika jamii” Mhe. Senyamule.

Aidha, Afisa Elimu Mkoa wa Dodoma Mwalimu Vicent Kayombo, amesema kuwa ameshirikiana vyema na viongozi waliopita kwa kipindi cha miaka mitano na kupata mafanikio hivyo, yupo tayari kufanya kazi na viongozi wapya watakaochaguliwa kwa kuwa wote ni wakwake.

Hata hivyo, Msimamizi wa uchaguzi huo Bi. Yunis Tesha, amesema uchaguzi huo unatokana na muundo wa sheria ya kazi pamoja na Katiba ambazo zinaongoza uchaguzi hivyo, ana imani kuwa Wajumbe wote watafanya uchaguzi wa haki kwa maslahi ya Chama na kila mtu ana haki ya kupiga kura kwani ni demokrasia ya kila mmoja.

Nae, Mwenyekiti Mstaafu wa CWT Mkoa wa Dodoma Mwl. Samweli Malechela amesema kuwa, Uongozi wake umelinda hadhi na heshima ya Chama hicho kwa kufanya kazi kubwa ambapo bado Chama kina Wanachama wengi katika Wilaya zote za Mkoa wa Dodoma tofauti na Mikoa mingine ambayo Wanachama wamegawanyika na kwenda kujiunga na vyama vingine

#dodomafahariyawatanzania

#keroyakowajibuwangu

#mtiwangubirthdayyangu

#karibumwengewauhuru2025mkoawadodoma