WALIMUI WATAKIWA KUWEKA MSISITIZO WA MASOMO KUANZIA MADARASA YA CHINI

Imetumwa : March 13th, 2025

Na Francisca Mselemu      

      Habari - Dodoma RS

Walimu wametakiwa kuweka msisitizo  wa masomo kwa Wanafunzi kuanzia madarasa ya chini, badala ya ilivyo sasa ambapo wamekuwa wakiweka msisitizo kwa madarasa ya mitihani.

Hayo yamebainishwa na Mhadhiri Mwandamizi wa Chuo Kikuu cha Dar es Salaam Daktari Mjege Kinyota ambaye alikuwa mmoja wa wawezeshaji wa mafunzo yaliyotolewa kwa Walimu wa masomo ya Kiingereza na Hisabati  ambayo yalifanyika katika Ukumbi wa Mikutano wa Kondoa Irangi uliopo Wilayani Kondoa mnamo Machi 13 na 14, 2025, ambapo amesema kuwa moja ya msisitizo waliouweka kwa walimu waliowapa mafunzo hayo ni kuhakikisha wanaweka msisitizo wa masomo kwenye madarasa yote.

“Suala jingine tulilolisisitiza sana, Walimu waache kusisitiza tu madarasa ya mitihani .Unapoanza  kuweka msisitizo  kwa Darasa la Nne na Darasa la Saba, wakati hukuweka msingi huku chini inaweza isitusaidie sana. Kwa hiyo tumesisitiza kwamba Walimu wakajenge msingi kuanzia chini. Kwa maana watoto wakijua kuhesabu, kusoma na kuandika katika ngazi ya chini, watakua na msingi mzuri ambao utawawezesha kufanya vizuri katika ngazi nyingine”.

Nao washiriki wa mafunzo hayo waliohojiwa kwa nyakati tofauti, walikuwa na haya ya kusema;

 “Kwanza nawashukuru Shule Bora  kwa kutuletea mafunzo haya, nitakwenda kuwapatia walimu wa masomo ya Hisabati na Kiingereza wa Halmashauri yangu ujuzi nilioupata, naamini kwa kufanya hivyo ufaulu katika masomo haya utaongezeka. Leticia Ndelwa, Afisa Elimu Taaluma Chamwino .

“Baada ya mafunzo haya, Mimi pamoja na walimu wote wa Kata yangu tulioshiriki, tutakwenda kuandaa  Jumuiya za Ujifunzaji, tutawaita walimu wote wa Hisabati na Kiingereza, tutawapatia ujuzi na uzoefu tulioupata wa namna nzuri ya kufundisha  ili kuweza kuinua ufaulu kwenye Halmashauri yetu. Emmanuel Lotto, Afisa Elimu Kata ya Buigiri.

“Matarajio yangu baada ya mafunzo haya, Mwalimu wa Shule yangu aliyeshiriki ataboresha mbinu za ufundishaji na ujifunzaji, lakini pia atajua namna gani anaweza kuwashirikisha wanafunzi zaidi kutokana na uzoefu ambao ameupata kutoka kwa walimu waliotoka Halmashauri nyingine”.

Hidaya Idowa, Mkuu wa Shule ya Msingi Makafa.

“Somo la Kiingereza ni pana, na ni lugha ngeni, lugha ngeni ina changamoto zake katika ujifunzaji, mafunzo haya yametupa ujuzi mpya, lakini pia kupitia kugawanywa kwenye makundi wakati wa mijadala tumeweza kukutana na walimu wengine ambao Shule zao zinafanya vizuri katika masomo haya, wametupa mbinu wanazozitumia, tumeshirikishana uzoefu” Emmanuel Kepha, Mwalimu wa Somo la Kiingereza Shule ya Msingi Mtumba.

“Msingi mkubwa wa kuliweza Somo la Hisabati ni kulipenda, watu wengi hawapendi hesabu kwa sababu ya  mtazamo uliojengeka miongoni mwa Jamii kwamba somo hili ni gumu, lakini sio gumu, mafunzo haya yametupa mbinu ambazo zitatusaidia katika ufundíshaji, mbinu hizo zitawafanya wanafunzi waelewe, lakini pia walipende Somo lenyewe. Kwa mbinu nilizozipata, Wanafunzi ninaowafundisha wataelewa vizuri zaidi, watalipenda Somo,na idadi ya wanaofaulu itaongezeka. Aidan Masima,Mwalimu wa Hisabati ,Shule ya Msingi Pwaga.

Mafunzo hayo ya siku mbili yaliyowahusisha Maafisa Elimu Msingi, Maafisa Elimu Taaluma, Maafisa Elimu Kata, Wakuu wa Shule za msingi pamoja na walimu wa Masomo ya Kiingereza na Hisabati kutoka wilaya zote za Mkoa wa Dodoma, chini ya ufadhili wa UK- Aid kupitia mradi wa Shule Bora, ni muendelezo wa jitihada za Serikali ya Awamu ya Sita ambayo tangu kuwepo kwake madarakani, imefanya uwekezaji mkubwa katika Sekta ya Elimu, mafunzo ya mara kwa mara kwa Walimu pamoja na Wasimamizi wa Elimu yakiwa  sehemu ya uwekezaji huo.

#keroyakowajibuwangu

#wekezadodoma,stawisha

dodoma

#mtiwangu,birthdayyangu