WANANCHI WAASWA KUTUNZA VYANZO VYA MAJI KWA VIZAZI VIJAVYO

Imetumwa : March 21st, 2025

Na. Hellen M. Minja,

       Habari – DODOMA RS

Rasilimali 'Maji', inatajwa kuwa bidhaa adhimu ambayo haina mbadala hivyo, kila Mdau anayehusika na utunzaji wa chanzo cha maji ametakiwa kuhakikisha rasilimali hiyo inatunzwa na kuwa endelevu kwa vizazi vyote kwa kuunga mkono juhudi za Serikali za utunzaji wa mazingira kwa kupanda miti.

Kauli hiyo imetolewa na Mkuu wa Mkoa wa Dodoma Mhe. Rosemary Senyamule, alipokua mgeni rasmi kwenye hafla fupi ya uzinduzi wa Programu shirikishi za uhifadhi wa rasilimali za maji katika hifadhi ya maji Bonde dogo la Makutupora Jijini Dodoma Machi 21, 2025.

Katika hotuba yake kwa Wadau na wakazi wa Kata ya Makutupora, Mhe. Senyamule amesema; "Tutambue kuwa rasilimali maji ni bidhaa adhimu ambayo haina mbadala hivyo, kila Mdau ana jukumu kubwa kuhakikisha rasilimali hii inatunzwa na kuwa endelevu kwa kizazi cha sasa na kizazi cha baadae.

"Sentensi hii tumeisikia mara nyingi lakini sina hakika kama watu wanaielewa. Kwani sisi leo tumekua waharibifu wa kukata miti bila kujali utunzaji wa mazingira. Ninyi ni wadau muhimu, ninawaomba muunge mkono juhudi za Serikali katika utunzaji na uhifadhi wa vyanzo vya maji ikiwemo kuomba vibali vya matumizi ya maji”. Ameongeza Mhe. Senyamule.

Aidha, Katibu Tawala Wilaya ya Dodoma Mjini Bi. Sakina Mbugi, ambaye amemuwakilisha Mkuu wa Wilaya hiyo Mhe. Jabir Shekimweri katika hafla hiyo amesema Wilaya yake inaendelea kufanya jitihada mbalimbali za kuangalia namna bora ya kuhifadhi chanzo hiki kikuu cha maji kwa kuwa ndio tegemeo kwa Wilaya yake.

Nae, Mkuu wa Ofisi ya Bodi ya Maji Bonde la Wami Ruvu Dodoma Muhandisi Noel Mushi, amesema, Bonde la Maji la Wami Ruvu limekua likifanya jitihada za utunzaji wa eneo hilo kwa kutoa elimu, kuweka alama za mipaka, mabango ya makatazo, kuchora na kusambaza ramani za eneo la hifadhi, kufanya tathmini ya eneo lililovamiwa na mengine kadhaa lengo likiwa ni kulifanya eneo hilo kuwa la kitalii.

Uzinduzi wa Program hiyo unalenga kuhamasisha utunzaji wa rasilimali za maji shirikishi ambazo zitalinda vyanzo vya maji na kunufaisha jamii zinazozunguka vyanzo hivyo. Hifadhi ya maji ya Bonde dogo la Makutupora, ni chanzo cha maji kinachotegemewa kwa sasa katika Jiji la Dodoma kwa asilimia 91.

#dodomafahariyawatanzania

#keroyakowajibuwangu#mtiwangubirthdayyangu