WANANCHI WAMEASWA KUFANYA MAZOEZI KUEPUKA MAGONJWA YASIYO YA KUAMBUKIZA

Imetumwa : February 13th, 2025

Na. Hellen M. Minja,

Habari - DODOMA RS

Magonjwa yasiyo ya kuambukiza kama shinikizo la damu, saratani,kisukari na mengineyo, yametajwa kuendelea kua tishio Duniani kwani takribani vifo Milioni 41 sawa na 73% vinatokana na magonjwa hayo yanayoweza kuzuilika kwa watu kuhamasika kufanya mazoezi ya viungo kila siku ili kuutengenezea mwili Kinga dhidi ya maradhi hayo hatari.

Mkuu wa Mkoa wa Dodoma Mhe. Rosemary Senyamule, ameyasema hayo leo Februari 13, 2025 katika Maadhimisho ya siku ya Familia ya Polisi iliyoandaliwa na Jeshi hilo Mkoani hapa ambapo Mkuu huyo wa Mkoa alikua mgeni rasmi kwenye uwanja wa Jamhuri Jijini Dodoma.

"Takwimu zinaonesha kuwa vifo Milioni 41 sawa na 73% ya vifo vinatokana na magonjwa yasiyo ya kuambukiza. Lakini hapa Tanzania, magonjwa haya yanachangia 33% ya vifo vyote vinavyotokea. Nikimaanisha katika kila vifo vitatu, kimoja kinatokana na magonjwa yasiyo ya kuambukiza hivyo nitoe shime, wote tulioamua kuchukua hatua ya kufanya mazoezi, tuendelee kufanya hivyo kwani tutachangia kupunguza magonjwa hayo Nchini" Mhe. Senyamule.

Aidha, Kamanda wa Polisi Mkoa wa Dodoma George Katabazi, amesema siku ya Familia ya Jeshi la Polisi Mkoa wa Dodoma inayokwenda sambamba na Bonanza la michezo na burudani nyingine nyingi, imeandaliwa mahsusi kwa lengo la kuimarisha Afya ya mwili kupitia mazoezi na burudani ili kuendelea kuwa na Jeshi imara wakati wote kwa ulinzi wa Mkoa.

Hata hivyo, Mbunge wa Mchinga na mke wa Rais Mstaafu wa awamu ya nne Mhe. Salma Kikwete nae ameungana na Jeshi hilo katika siku hiyo akilipongeza kwa kuandaa siku hiyo kwani inahamasisha ukakamavu kupitia mazoezi ya kutembea lakini pia inaimarisha umoja na upendo kupitia kushiriki michezo mbalimbali iliyoandaliwa.

Siku ya Familia ya Polisi Mkoa wa Dodoma ambayo imeshirikisha vyombo vyote vya Ulinzi na Usalama Mkoa pamoja na klabu mbalimbali za mazoezi (jogging) zinazopatikana katika Jiji hili, ilianza na matembezi yaliyoanzia viwanja vya Chinangali, Nyerere square na hatimae uwanja wa Jamhuri, imeongozwa na kauli mbiu isemayo "Sisi ni Familia, Ushirikiano ni Nguzo Yetu".

#dodomafahariyawatanzania

#keroyakowajibuwangu

#mtiwangubirthdayyangu