WANANCHI WANATAKIWA KUUZA DHANA POTOFU UANDIKISHAJI DAFTARI LA MPIGA KURA.

Imetumwa : September 27th, 2024

Na Hellen M. Minja, Habari  - RS DODOMA

Mkuu wa Mkoa wa Dodoma Mhe. Rosemary S. Senyamule, amewataka wananchi kupuuza dhana potofu juu ya zoezi la uandikishaji na uboreshaji wa daftari la kudumu la Mpiga kura linaloendelea kwenye baadhi ya Wilaya za Mkoa wa Dodoma kwamba kuna gharama zinazohitajika kufanikisha.

Mkuu huyo wa Mkoa ameyasema hayo wakati wa Mkutano na waandishi wa habari aliouitisha leo Septemba 27, 2024, kwenye ukumbi wa ofisi yake liliyopo jengo la Mkapa Jijini Dodoma kuzungumzia mchakato huo unaoendelea.

“Uandikishaji wapiga kura au uboreshaji taarifa za wapiga kura ni bure. Mwananchi hatakiwi kulipa fedha yeyote katika mchakato huu, dhana kwamba kuna gharama zinazohusiana na uandikishaji ni za uongo na zinapaswa kupuuzwa” Amesema Mhe. Senyamule

Aidha, ametoa ufafanuzi juu ya wananchi wenye vitambulisho vya zamani kwamba hawana sababu ya kujiandikisha upya kwani vitambulisho hivyo ni halali na vinaweza kutumika tena.

“Tunatoa ufafanuzi kwamba, vitambulisho vilivyotolewa hapo awali ni vitambulisho halali na vinaweza kutumika tena kwenye uchaguzi wa mwaka huu. Hivyo basi, wananchi ambao walikwisha kujiandikisha huko nyuma, hawapaswi kuhofia kuwa vitambulisho vyao vimekwisha muda wake na hawahitaji kujiandikisha tena ili kupata kadi mpya” Mhe. Senyamule.

Hata hivyo, Mkuu wa Mkoa huyo ametoa ufafanuzi kuhusu uhusiano kati ya uboreshaji wa daftari la kudumu la mpiga kura na uchaguzi wa Serikali za Mitaa.

“Mchakato huu wa uboreshaji wa daftari la kudumu la mpiga kura ni kwa ajili ya uchaguzi mkuu wa mwaka 2025, unafanywa ili  kuhakikisha kuwa kila Mtanzania mwenye haki ya kupiga kura, anapata nafasi ya kumchagua Diwani, Mbunge na Rais. Hauhusiani moja kwa moja na uchaguzi wa Serikali za Mitaa, taratibu zake za uandikishaji zilishatangazwa na Waziri Mwenye Dhamana”.

Mkoa wa Dodoma unakadiriwa kuwa na wapigakura 1,777,834, kati yao ambao hawajawahi kujiandikisha kwenye daftari ni 845,976. Vituo vya kuandikisha wapiga kura katika wilaya ya Dodoma ni 429, Bahi 191, Kongwa 229 na Chamwino ni 805.

#dodomafahariyawatanzania

#dodomatukotayarikujiandikisha