WANAWAKE WAHIMIZWA KUWA WA MFANO KWA KUMTEGEMEA MUNGU

Imetumwa : October 14th, 2024

Na. Hellen M. Minja

       Habari - DODOMA RS

Mkuu wa Mkoa wa Dodoma Mhe. Rosemary S. Senyamule, leo Oktoba 14, 2024, ameongoza hafla ya 'Mwanamke wa Mfano' iliyoandaliwa na huduma ya 'Love of Christ' kwa lengo la Mwanamke kujifunza kuwa wa Mfano katika jamii ndani ya ukumbi wa hoteli ya Four point, Kisasa Jijini Dodoma.

Katika hafla hiyo iliyoongozwa na kauli mbiu ya "Mwanamke wa Mfano, anachagua fungu lililo sahihi" pamoja na Neno kutoka kwenye kitabu cha Biblia Takatifu Luka 10:42, Mhe. Senyamule amehimiza suala la bidii katika utumishi;

"Serikali inatamani ipate watumishi wenye bidii, fanya bidii ikiwa unamtegemea Mungu. Uongozi unataka dhamira ya kuwatumikia wananchi. Kumtegemea Mungu kunataka kujitoa ili aoneshe karama na uwezo wako. Ukiamua kuwa wa Mfano, hakuna utakaloshindwa, weka dhamira ya dhati na umtegemee Mungu". Mhe. Senyamule

Hata hivyo, Mratibu wa hafla hiyo kutoka huduma ya 'Love of Christ' Bi Stella Shemdoe, amesema hiyo ni siku ya kijamii kwa Mwanamke kujifunza jinsi ya kuwa wa 'Mfano' kwenye jamii kwa kualika viongozi wa kijamii na wazungumzaji watakaozungumzia juu ya Mwanamke kuwa wa 'Mfano'.

Miongoni mwa wazungumzaji katika shughuli ni Bi Irene Mbowe ambaye alizungumzia kwa upana sifa za 'mwanamke wa Mfano'.

"Sifa za 'Mwanamke wa Mfano' ni tatu, kwanza anatakiwa awe na mahusiano mazuri na Kanisa, familia na jamii. Mwanamke huyu anatakiwa kuleta mabadiliko ndani ya Kanisa, familia, jamii na hatimaye Taifa kwa ujumla" Amesema Bi. Mbowe

Huduma ya 'Love of Christ' huandaa hafla hiyo kila mwaka na ni endelevu katika siku za mapumziko ambapo huwa ni siku za kiroho ambazo huambatana na wanawake kujifunza dini, mafungo, maombi na malezi huku siku ya kwanza ikiwa ni ya kijamii.