WANAWAKE WAITWA JAKAYA KIKWETE MACHI 3,KUSHIRIKI KONGAMANO

Imetumwa : March 1st, 2025

Na. Sizah Kangalawe Habari- DodomaRS

Wanawake wa Mikoa ya Dodoma, Iringa na Singida, mnakaribishwa kushiriki kongamano la wanawake ikiwa ni shamrashamra za kuelekea kilele cha Maadhimisho ya Siku ya Wanawake Duniani yanayofanyika  Machi 8, kila mwaka.

Ukaribisho huo umetolewa na Mkuu wa Mkoa wa Dodoma Mhe. Rosemary Senyamule wakati akizungumza na Waandishi wa Habari leo Machi Mosi, 2025 Ofisini kwake jengo la Mkapa Jijini Dodoma.

Mhe. Senyamule Amesema " lengo kuu la kongamano hilo ni kuongeza idadi ya  wanawake Ili kuwa na uwakilishi wa kutosha , kwenye nafasi za uongozi kuanzia ngazi ya msingi, kati na ya juu.

" Uwakilishi wa kutosha kwa wanawake wenye taaluma utasaidia kuwa na mipango inayozingatia mahitaji ya kijinsia kwa makundi yote ya kijamii", RC Senyamule

Hatahivyo Mhe. Senyamule amesema mpango wa kongamano hilo umelenga kuwajengea Wanawake  mtandao mpana wa mahusiano ili kuweza kushirikiana kupata taarifa na kuweza kutambua fursa mbalimbali zilizopo kwenye jamii na kuzitumia.

Mgeni rasmi katika kongamano hilo anatarajiwa kuwa Spika Mstaafu wa Bunge la Jamuhuri ya Muungano wa Tanzania Mhe. Anna Makinda.

Kongamano hilo linafanyika likiongozwa na kaulimbiu ya " Wanawake na Wasichana 2025: Tuimarishe Haki, Usawa na Uwezeshaji".

#dodomafahariyawatanzania

#keroyakowajibuwangu

#mtiwangubirthdayyangu