WATAALAMU TATUENI KERO ZA WANANCHI TUZIMALIZE KABISA-RC SENYAMULE

Imetumwa : March 5th, 2025

Na. Hellen M. Minja,

       Habari – DODOMA RS

Msisitizo umetolewa kwa Wataalam wanaohusika na masuala ya wananchi kuhakikisha wanatatua kero zao na kuzimaliza kabisa ili zisijirudie mara kwa mara pindi viongozi tofauti wa Serikali wanapofanya ziara kwenye maeneo yao ambayo wataalam hao walishayapitia.

Mkuu wa Mkoa wa Dodoma Mhe. Rosemary Senyamule, amebainisha hayo wakati wa ziara yake ya kikazi kukagua miradi ya maendeleo katika Kata ya Nzuguni Jijini Dodoma Machi 04, 2025 sambamba na kufanya mkutano wa hadhara na wananchi kwenye Ofisi za Kata ulioibua kero kuhusu  migogoro ya ardhi.

“Wataalam, tungetamani tukija hapa Nzuguni tukutane na kero mpya lakini sio zile ambazo tulishaambiwa na kuahidi kuzishughulikia. Nisisitize, tatueni kero za wananchi, tuzimalize kabisa. Tunatamani tusikie migogoro ya ardhi iliyotatuliwa  ikafika mwisho, kwani tangu kuanza program ya kusikiliza migogoro ya ardhi, kero hii imepungua kwa kiasi kikubwa”. RC Senyamule.

Aidha, Mkuu wa Wilaya ya Dodoma Mjini Mhe. Jabir Shekimweri amesema kuhusu masuala ya ardhi, kila kero iliyowasilishwa itolewe maelezo ya kina na ushahidi wa nyaraka na kuongeza kuwa hata wale watakaoleta kero zao kwa njia ya simu, kanuni itakayotumika ni hiyo hiyo ya ushahidi wa nyaraka.

Katika Mkutano huo, Mkurugenzi wa Jiji la Dodoma Dkt. Fredrick Sagamiko, ametolea ufafanuzi kero za ardhi na kusema kuwa  Machi 05, 2025, Wataalam wa ardhi kutoka ofisini kwake wataweka kambi kwenye eneo hilo kusikiliza na kutatua kero zote zinazowakabili wananchi hao hivyo wafike na nyaraka zao bila kukosa.

Mbali na Mkutano huo, Mhe. Senyamule ametembelea miradi ya maendeleo inayotekelezwa kwenye Kata hiyo ikiwemo mradi wa sekta ya afya ambao ni ujenzi wa nyumba ya Watumishi wa Zahanati ya Kitelela (mbili kwa moja) ambao umekamilika kwa gharama ya shilingi milioni 60 na umeanza kutumika.

Miradi mingine iliyotembelewa ambayo imetekelezwa kwa fedha za mapato ya ndani ya Halmashauri, ni ujenzi wa matundu 10 ya vyoo  katika shule ya Msingi Mahomanyika ambao umegharimu shilingi milioni 18, pamoja na ujenzi wa matundu 10 ya vyoo kwenye shule ya Msingi Nzuguni B uliogharimu shilingi milioni 20.

Ziara ilihitimishwa katika shule ya Sekondari ya Kata ya Nzuguni iliyoanzishwa mwaka 2007,ambayo kwa sasa ina jumla ya wanafunzi 1344 ,mradi  unaotekelezwa  ni  ujenzi wa vyumba 4 vya  madarasa na ofisi kwa thamani ya shilingi milioni 129.5

#dodomafahariyawatanzania

#keroyakowajibuwangu

#mtiwangubirthdayyangu