WATUMISHI KUWENI WAZALENDO MHE SENYAMULE

Imetumwa : July 14th, 2023

WATUMISHI KUWENI WAZALENDO-MHE.SENYAMULE

Mkuu wa Mkoa wa Dodoma Mhe. Rosemary Senyamule amewataka watumishi wote wa umma kuacha tamaa ya fedha za Miradi ya Serikali na kutanguliza utu na uzalendo mbele ili kujenga na kudumisha Uchumi wa Taifa. Amesema kila mtumishi wa Serikali anao wajibu wa kulinda fedha zote zinazotolewa kutekeleza Miradi Mbalimbali.

Senyamule ameyasema hayo wakati akihitimisha ziara yake ya kuzungumza na madiwani katika Halmashauri zote nane za Mkoa wa Dodoma kuhusu hoja za Mkaguzi na Mdhibiti Mkuu wa Hesabu za Serikali kwa mwaka wa fedha 2021/2022, katika kikao kazi cha Baraza la Madiwani wa Jiji la Dodoma kilichofanyika katika ukumbi wa Mikutano wa Jiji la Dodoma leo Julai 14/2023.

‘’Watumishi au wataalamu wa kada mbalimbali nyie ndio mmepewa dhamana ya kumsaidia Mhe. Rais Dkt. Samia Suluhu Hassan kwa hiyo mnapopewa fedha za kutekelezea miradi na zikabaki kuweni wazi kwa kutanguliza uzalendo mbele na kuzitolea taarifa na kuzirejesha fedha hizo ili zitumike kufanyia jambo jingine lenye maslahi kwa wananchi wetu”.

Aidha katika kikao hicho Senyamule ameitaka Menejimenti ya Jiji la Dodoma kuhakikisha inaweka makisio sahihi ya vitega uchumi vyake pamoja na kuongeza kasi ya ukusanyaji wa Mapato ili kuongeza na kuimarisha uchumi wa Mkoa huo.

“Halmashauri ya Jiji inatakiwa kuwa na makisio sahihi ya vyanzo vyake vya vitega uchumi wake na ongezeni kasi ya makusanyo ili kuimarisha uchumi wa Mkoa kwasababu mnafahamu Jiji letu lina vitega uchumi vingi, tumieni fursa ya makao Makuu kuongeza mapato kwa kutumia fursa mbalimbali zinazojitokeza bila kuathiri mifumo ya kiutendaji” amesema Senyamule.

Kwa Upande wake Mkuu wa Wilaya ya Dodoma Mhe. Jabir Shekimweri ameyataja mambo ambayo yakifanyika yanaweza kuondoa na kuepukana na hoja za Mdhibiti na Mkaguzi Mkuu wa Hesabu za Serikali kuwa ni pamoja na kufuata kanuni, Sheria, Miongozo na Taratibu za Kazi, Mkaguzi wa ndani kufanya kazi kwa weledi na kufanya  kazi kwa uhuru  wake pasi na kuingiliwa na kuwa na Tume ndogo ya Watendaji wa kuthibiti hoja za mkaguzi Mkuu na Tume hiyo iwe na uwezo wa kuwawezesha na kuwajengea uwezo Wahasibu wa kujibu hoja mbele ya Mkaguzi Mkuu.

Katika vikao kazi vya Mkuu wa Mkoa na Mabaraza ya Madiwani wa Halmashauri za Wilaya, na Jiji la Dodoma, Mhe.Senyamule kwa nyakati tofauti amezitaja agenda za kudumu za Mkoa ambazo ni Mazingira, usimamizi wa Mapato ya Halmashauri, Elimu  ikiwa ni kukomesha utoro shuleni na kukuza kiwango cha ufaulu.