WAZAZI WAHAMASISHENI WATOTO KUSOMA KWA BIDII ; WAZIRI MCHENGERWA

Imetumwa : February 6th, 2025

Na: Sophia Remmi

 Habari - Dodoma RS

Waziri wa Nchi Ofisi ya Rais,Tawala za Mikoa na Serikali za Mitaa (OR - TAMISEMI) Mhe. Mohamed Mchengerwa, amewataka Wazazi  kuwahimiza watoto wao kwenda Shule.

Waziri Mchengerwa ameyasema hayo leo Februari 06, 2025 wakati wa hafla ya kukabidhiwa vyumba 18 vya madarasa na ofisi 6 katika Halmashauri ya Wilaya ya Bahi, madarasa ambayo umaliziaji wake umefadhiliwa na Serikali ya Uingereza kupitia Programu ya Shule Bora Tanzania. Hafla hiyo imefanyika katika Shule ya mchepuo wa Kiingereza (Bahi English medium) Wilayani Bahi.

Akisisitiza kuhusu umuhimu wa elimu, Waziri Mchengerwa amesema "Mtaji wa wananchi wetu ni kuhakikisha watoto wetu wanasoma. Sisi tunaotoka ng'ambo ya miji, elimu ndio mtaji wetu.Wazazi wahamasisheni watoto kusoma kwa bidii. Elimu ni ufahamu wa maisha, elimu ni ufunguo"

Kwa upande wake  Mkuu wa Mkoa wa Dodoma Mhe Rosemary Senyamule, amemshukuru  na kumpongeza Mhe. Rais kwa kazi kubwa anayoifanya, ambapo Wananchi sasa wanashuhudia mapinduzi makubwa katika kila sekta.

"Kwa upande wa elimu, Mkoa wetu wa Dodoma, kama alivyofanya nchi nzima ya Tanzania, na Dodoma amefanya kuanzia ngazi ya chini kabisa hadi ngazi ya juu kabisa. Daktari Samia Suluhu Hassan ni Kiongozi wa kuleta majawabu. Sisi tulikuwa tunatumia nguvu nyingi kuwaamsha watoto kwenda Shule.Wakati mwingine hadi mama akuchape ndio unaamka kwenda Shule, ilikuwa kama kero, Mhe. Rais akaja na suluhisho rahisi, kuwa msipige watoto, wekeni vivutio shuleni, mkiweka vivutio mtoto anakwenda shule hata hutahangaika kumuamsha".

Naye, Balozi Mdogo wa Ubalozi wa Uingereza Sally Hedley aliyehudhuria hafla hiyo  pamoja na ujumbe wake alioambatana nao ambao ni Mtendaji Mkuu wa ofisi ndogo ya ubalozi wa Uingereza Jijini Dodoma Bi Godfrida Magubo, Mkuu wa Programu ya Shule Bora Tanzania Bi Virginie Briand pamoja na watendaji wengine wa Program hiyo,  ameipongeza Serikali hasa wizara mbili (2) zinazozimamia Programu hiyo ambazo ni Wizara ya Elimu na OR - TAMISEMI, huku akisisitiza kuwa elimu ni kipaumbele muhimu cha Serikali ya Uingereza  ndio sababu wanafadhili miradi mbalimbali  inayolenga kupunguza athari za mabadiliko ya tabia nchi katika ujifunzaji.

Programu ya Shule Bora inatekelezwa katika mikoa tisa (9) ya Tanzania Bara na Halmashauri 67 tangu kuanza kwake mnamo mwaka 2021 na imefanya kazi nyingi zikiwemo utoaji wa mafunzo kwa walimu na ujenzi wa vyumba vya  madarasa.