‘BASKET FUND’ YASAIDIA KUPUNGUZA VIFO VYA UZAZI MKOA WA DODOMA

Imetumwa : July 21st, 2025

Na. Hellen M. Minja

       Habari – DODOMA RS

Mkoa wa Dodoma umefanikiwa kupunguza vifo vya Mama na watoto wachanga wakati wa kujifungua kutokana na uboreshaji mkubwa unaofanyika kwenye sekta ya Afya hususan kupitia msaada unaotolewa na Serikali ya Kanada nchini Tanzania kupitia Mfuko wa ‘Basket’ unaolenga kuboresha huduma za Afya ya uzazi.

Hayo yamebainishwa Julai 21, 2025 na Mkuu wa Wilaya ya Dodoma Mhe. Jabir Shekimweri alipokua akizungumza kwa niaba ya Mkuu wa Mkoa wa Dodoma Mhe. Rosemary Senyamule wakati wa ziara ya Waziri wa Maendeleo ya Kimataifa wa Kanada Mhe. Randeep Sarai katika Kituo cha Afya cha Makole Jijini humu.

“Malengo ya nchi ni kupunguza vifo wakati wa kujifungua kutoka 566 kwa vizazi hai 100,000 na hapa Dodoma  tumeona mabadiliko makubwa, kwa mwaka uliopita ambapo tulisajili vifo 75 kutoka vizazi hai 100,000 na 58 kutoka mwezi Januari mpaka sasa ambapo ni matokeo ya Mfuko huu”.

Aidha, Mganga Mkuu wa Mkoa wa Dodoma Thomas Rutachunzibwa, amesema kupitia ‘Basket fund’, walipokea shilingi Milioni 500 kwa ajili ya upanuzi wa majengo ya kutolea huduma za uzazi lakini bado hayakidhi ongezeko la wagonjwa hivyo, wameanza mradi wa ujenzi wa jengo la ghorofa nne ambapo wameomba msaada ili kulikamilisha kwa haraka.

Awali, akitoa taarifa fupi ya matumizi ya fedha za Mfuko zilizotolewa kwenye Kituo hicho , Mganga Mfawidhi wa Kituo Revocatus Baltazary, amesema katika kipindi cha miaka mitano iliyopita, kituo kilipokea shilingi Milioni 638 sawa na Dola 244 ambapo 35% ilitumika kununua dawa, kukarabati chumba cha dawa, maabara na jengo la kuhifadhia vifaa vya kitabibu.

Vilevile, 65% ya fedha hizo pia ilitumika kuboresha huduma mbalimbali kama vile mafunzo kwa watoa huduma za afya, kusaidia huduma za lishe, huduma za uzazi wa Mpango pamoja na kuboresha huduma za Mkoba za ndani na nje.

Ziara ya Kiongozi huyo, inalenga kuangalia miradi ya Afya inayotekelezwa Nchini, hasa inayofadhiliwa na Serikali ya Kanada kupitia Mfuko wa ‘Basket’ inavyotoa huduma kwa wananchi, kwani Kanada ni moja ya wachangiaji wakubwa nchini kwenye sekta ya afya na Kituo cha Makole Mkoani hapa kinanufaika na Mfuko huo.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu