RC SENYAMULE AZUNGUMZA NA WAZEE WA MKOA WA DODOMA

Imetumwa : October 9th, 2025

Na. Hellen M. Minja

       Habari – DODOMA RS

Mkuu wa Mkoa wa Dodoma Mhe. Rosemary Senyamule amekutana na kuzungumza na kundi la Wazee wa Mkoa wa Dodoma kuhusu mambo mbalimbali hususan maendeleo ya Mkoa sambamba na kusikiliza kero zinazowakabili kwenye ukumbi wa Ofisi yake Jijini Dodoma Oktoba 09, 2025.

Wazee hao ambao wametoka kwenye Halmashauri zote 8 za Mkoa wa huu, wamepata fursa ya kuwasilisha kero zao mbele ya Mkuu wa Mkoa ambazo zilipata majibu kutoka kwa Wataalam walioshiriki kikao hicho kilichoambatana na mada mbalimbali.

Miongoni mwa kero zilizowasilishwa kwa wingi na Wazee hao ni huduma za Bima ya Afya kwa Wazee ambapo wengi wamelalamikia huduma hiyo kuwa hairidhishi pindi wanapokwenda Hospitali au kwenye Vituo vya Afya kwani wamekua wakipata changamoto ya kupatiwa baadhi ya huduma kwa madai ya Bima zao kutokidhi.

Aidha, Afisa kutoka Mfuko wa Taifa wa Bima ya Afya Nchini (NHIF) amejibu kero hiyo kwa kutoa ufafanuzi juu ya matumizi ya Bima hizo na kusema kuwa kwa sasa Serikali imeboresha huduma hiyo na Wazee wanahudumiwa bila shida hivyo muhimu ni kufuata utaratibu na endapo itatokea changamoto wawasiliane nae.

Mbali na hilo, Wazee hao wamepata fursa ya kupata mada kama vile Mafanikio ya Serikali ya awamu ya sita kwenye Mkoa wa Dodoma katika kipindi cha miaka minne ya Rais Mhe. Dkt. Samia Suluhu Hassan, elimu ya mpiga kura kwenye kipindi cha kuelekea Uchaguzi Mkuu Oktoba 29, magonjwa yasiyo ya kuambukiza pamoja na Bima ya Afya.

#DodomaFahariyaWatanzania

#KuraYakoHakiYakoJitokezeKupigakura

#NimejiandikishaNitapigaKura

#UmejiandikishaKapigeKura