DKT. BITEKO AZINDUA MRADI WA UMEME KILOVOTI 400 KUTOKA CHALINZE HADI DODOMA

Imetumwa : December 11th, 2024

Na. Hellen M. Minja,

       Habari – DODOMA RS

Naibu Waziri Mkuu na Waziri wa Nishati Mhe. Dkt. Doto Mashaka Biteko, leo Desemba 11, 2024, amezindua mradi wa njia ya kusafirisha umeme wa msongo wa kilovoti 400 kutoka Chalinze Mkoa wa Pwani hadi Dodoma unaogharimu kiasi cha shilingi Bilioni 513 sambamba na kuweka jiwe la msingi katika mradi huo.

Hafla hiyo imefanyika katika eneo la Zuzu Jijini Dodoma, ambapo mradi huo unalenga kuongeza uzalishaji wa umeme pamoja na upatikanaji wake kwa uhakika, ikiwa ni pamoja na ziada ya kuuza nchi jirani.

“Tupo mbioni kuhakikisha kuwa kila aliye jirani yetu kwa nchi zote zinazotuzunguka tunaziunganisha na umeme na njia za kupitisha umeme.Tumeshajiunga na Burundi, Rwanda, Kenya, sasa tunakwenda Zambia baadae tutajiunga na Malawi. Nia yetu ni kwamba umeme tulionao ,usiwe tu tunasema tuna umeme wa kutosha wakati tumeacha kufanya biashara na wenzetu.” Dkt Biteko

Kwa upande wake Naibu Waziri wa Nishati Mhe. Judith Kapinga (MB), amesema Tanzania inategemewa na nchi za Mashariki mwa Afrika kwa mambo makubwa mawili ikiwemo miradi mikubwa ya uzalishaji umeme inayoendelea, lakini pia kwa miradi ya usafirishaji umeme ambayo inafanyika na inatambuliwa na nchi jirani.

Aidha,Mkuu wa Mkoa wa Dodoma Mhe. Rosemary Senyamule, amesema Mhe. Rais amewezesha vijiji vyote 564 vya Mkoa wa Dodoma kufikiwa na huduma ya umeme ambapo kwa sasa vijiji 22 vipo kwenye hatua za ukamilishaji lakini vijiji vingine vyote 542 umeme umeshafika na wananchi wanafurahia kufanya shughuli za kiuchumi kupitia matumizi ya nishati hiyo.

Katika hatua nyingine,Mkurugenzi Mtendaji wa Shirika la Umeme Tanzania TANESCO Mhandisi Gissima Nyamo-Hanga amesema mradi huu umekusudia kusafirisha umeme utakaozalishwa kwenye bwawa la Mwalimu Julius Nyerere ambao una ukubwa wa Megawati 2115 na kuingiza umeme huo kwenye gridi ya Taifa.

Ameongeza kuwa, hali ya upatikanaji wa umeme Nchini imeendelea kuimarika kutokana na uzalishaji wa umeme kukidhi mahitaji ambayo yameendelea kukua kwa kasi na kufikia Megawati 1888.72 ambayo yalifikiwa tarehe 26/11/2024 saa 2 usiku hali ambayo imechangiwa na kuunganishwa kwa mitambo mitano kutoka bwawa la Julius Nyerere kuingia katika gridi ya Taifa.

#dodomafahariyawatanzania

#keroyakowajibuwangu        

#mtiwangubirthdayyangu