TAASISI ZA KITAFITI TIBA ASILI ZASISITIZWA UFANISI WA VIWANGO VYA KIMATAIFA

Imetumwa : August 29th, 2025

Na. Hellen M. Minja

       Habari – DODOMA RS

Msisitizo umetolewa kwa Taasisi za Kitafiti, Vyuo Vikuu na Maabara kuendelea kufanya kazi za kisayansi ili kuboresha ubora, usalama na ufanisi wa dawa za tiba asili kwa lengo la kuipeleka sekta ya dawa za asili kwenye viwango vya Kimataifa.

Hayo yamebainishwa katika hotuba ya Waziri Mkuu wa Tanzania Mhe. Kassim Majaliwa iliyosomwa kwa niaba yake na Katibu Tawala Mkoa wa Dodoma Dkt. Khatibu Kazungu alipokua akihutubia siku ya kilele cha Wiki ya Tiba Asili kilichofanyika Agosti 29, 2025 katika Viwanja vya Bustani ya mapumziko Chinangali Jijini Dodoma.

“Taasisi za utafiti, Vyuo Vikuu na Maabara, endeleeni kufanya kazi za kisayansi ili kuboresha ubora, usalama na ufanisi wa dawa za tiba asili, lengo letu ni ili sekta hii tuweze kuipeleka katika viwango vya watu wa Kimataifa, uimarishaji wa viwanda na ushirikishwaji wa Wadau pia ufanyike ili kuongeza ubora na ushindani wa ndani na nje ya nchi”.

Aidha, Kaimu Katibu Mkuu wa Wizara ya Afya Bw. Ismail Rumatila amesema Shirika la Afya Duniani (WHO) linatoa kipaumbele kwenye huduma za tiba asili katika nchi wanachama kwani zimeendelea kufadhiliwa na kupewa kipaumbele hivyo Wizara yake kupitia idara ya Tiba asili imeandaa wiki hiyo kwa kuzingatia ufanisi na ubora wa hali ya juu.

Vile vile, Mganga Mkuu wa Serikali Grace Maghembe amesema kwa sasa dawa za tiba asili zimefanyiwa tafiti na zinatumika ndani ya Hospitali takribani 14 ambapo sasa mgonjwa ana uwezo wa kuchagua aina ya dawa ikiwa ni asili au za kisasa baada ya kufanyiwa uchunguzi na mganga na huduma hiyo inapatikana kwenye madirisha ya dawa.

Hata hivyo, Mwakilishi wa Naibu Katibu Mkuu OR-TAMISEMI anayehusika na masuala ya Afya Bw. Zuber Abdallah amesema katika kuhakikisha huduma za tiba asili zinatolewa kwa viwango bora, Serikali imechukua hatua mbalimbali katika kuhakikisha huduma hizo zinakua endelevu lakini pia zina akisi mahitaji halisi ya jamii lakini pia ubora na ufanisi.

Wiki ya Tiba Asili ilianza kuadhimishwa takribani miaka 23 iliyopita ambapo ni matokeo ya kikao cha Wakuu wa nchi waliokaa Jijini Lilongwe nchini Malawi na kuangalia ni namna gani Bara la Afrika linaweza kutoa kipaumbele kwenye matumizi ya tiba asili na tiba mbadala kwani 80% ya wananchi wake wanatumia tiba mbadala.

Kauli mbiu: “Tuimarishe Huduma za Tiba Asili Zenye Ushahidi wa Kisayansi”

 #dodomafahariyawatanzania

#wekezadodomastawishadodoma

#keroyakowajibuwangu