DODOMA YAFANYA TATHMINI YA MICHEZO YA UMITAMSHA NA UMISSETA

Imetumwa : July 22nd, 2025

Na; Happiness E. Chindiye

      Habari - Dodoma RS

Katibu  Tawala Msaidizi Sekta ya Elimu  Mwl. Vicent Kayombo Julai 21,2025 amekutana na Maafisa Elimu Halmashauri, Maafisa Elimu Kata na Maafisa Michezo wa Halmashauri zote za Mkoa huu kwa lengo la kufanya tathmini ya michezo ya Umoja wa Mchezo na Taaluma kwa Shule za Msingi Tanzania (UMITASHUMTA)  na Umoja wa Mchezo ya Shule Sekondari (UMISSETA).

Akizungumza kwenye kikao hicho kilichofanyika kwenye ukumbi wa Maria de Matias amewataka maafisa hao kuwa mstari wa mbele kuhakikisha mashindano hayo katika Mkoa  wa huu  unakuwa wa kitofauti na kuwa  kinara kwenye mashindano hayo.

“Kufika kwenu katika kikao hiki cha tathmini si kwa bahati mbaya, ninyi nyote ndio kisima cha maarifa ya mafanikio ya michezo kwenye Mkoa wetu. Natamani nyote mliopo hapa kila mmoja adhamirie kwenda kufanya jambo zuri litakaloacha alama mahali alipo kwenye sekta hii ya michezo.

Kila mtu uone michezo ya mwaka 2026 ya UMITASHUMTA na UMISSETA ina siku chache kabla ya kuanza ili usukumwe kuweka mikakati yako binafsi katika kufanya jambo litakalotufanya wote tutakapo kutana tena mwakani tukupongeze kwa kutekeleza maazimio ya kikao hiki kwa uzalendo.

“Kuna usemi wa Kiswahili unasema ‘’palipo na nia pana njia’’ nia ipo ndio sababu ya sisi kukutana leo mahali hapa, jukumu lenu kila mmoja ni kuonesha njia ilipo, kama ipo kwenye soka kafanye jambo kwenye soka, kama ipo kwenye mpira wa goli kafanye jambo kwenye goli, kama ipo kwenye riadha kafanye jambo kwenye riadha kadhalika na michezo mingine yote tunayoshiriki ngazi ya Taifa, kila mmoja ajipime aone kwake njia ipo eneo gani.

" Tunaowajibu wa kufanikisha Mkoa wetu kwa sababu sisi ndio wataalamu lazima tuufanye mkoa wa dodoma uwe katika sura ya kitofauti" - Ameeleza Mwl. Kayombo

Aidha Afisa Elimu huyo amewapongeza timu hiyo kwa jitihada zote walizofanya kwenye mashindano hayo ya mwaka huu na kwa ushindi kwenye mchezo iliyofanya vizuri na kuwatia moyo kuongeza juhudi kwa ajili ya mashindano yajayo.

Kikao cha tathmini katika eneo la mchezo kimeibua ari ya maafisa hao kutoa maoni yao na kuweka  maazimio ya pamoja ambayo yatasaidia yatasababisha sekta hiyo kufanikiwa kwa kiwango kizuri kwenye mashindano ya mwaka 2026.

#dodomafahariyawatanzania

#keroyakowajiwangu