DODOMA YAJIANDAA KWA TUKIO KUBWA LA ZIARA YA MABALOZI MEI 27

Imetumwa : May 23rd, 2025

Na. Hellen M. Minja

       Habari – DODOMA RS

Mkuu wa Mkoa wa Dodoma Mhe. Rosemary Senyamule amefanya Mkutano na Waandishi wa Habari Mei 23, 2025 kwenye ukumbi wa Ofisi yake Jijini Dodoma ukiwa na lengo la kuutangazia Umma juu ya tukio kubwa la Kimataifa la ziara ya Mabalozi Mkoani hapa.Mabalozi hao ni wale wanaoiwakilisha Tanzania kwenye nchi mbalimbali Duniani,na wanaoziwakilisha Nchi zao hapa Nchini.

Tukio hilo litakalofanyika siku ya Jumanne Mei 27, linatarajiwa kuwa la kipekee ambapo Mhe. Senyamule ameelezea dhumuni hasa la ugeni huo.

“Dhumuni la kwanza ni kuwaeleza Waheshimiwa Mabalozi mambo yaliyopo katika Mkoa wa Dodoma na kuwa tuna huduma zote, wakiishi hapa; afya, elimu, miundombinu, maji, umeme na vitu vingine ambavyo vingemfanya mtu afurahie kukaa mahali, tunataka tuwaoneshe kuwa Dodoma huduma hizo tayari zipo na tunatamani waje sasa”.

Aidha, Mhe. Senyamule amesema kuwa Dodoma ina vivutio vingi vya utalii na fursa za uwekezaji hivyo anatamani watu kutoka nchi mbalimbali duniani,zikiwemo  ambazo mabalozi hao wanatoka,waje kuwekeza,kadhalika kuwaonesha kuwa Dodoma ni mahali sahihi na kuna fursa ya kufurahia utalii kama yalivyo maeneo mbalimbali ya nchi yetu.

Kadhalika, Mkuu huyo wa Mkoa amebainisha kuwa wanatamani Dodoma iwe na majina ya nchi za Kimataifa katika Mitaa kwani wanatamani Dunia ihamie Dodoma kwa kuwaambia Mabalozi fursa hiyo ambayo itawawezesha kufahamu maeneo kwa majina ya nchi zao kama vile mtaa wa Wachina, Wahindi na mingineyo ipatikane Dodoma.

Jambo jingine lililokusudiwa kwenye ziara hiyo ni kuwafahamisha wageni hao kuwa Dodoma ina Wilaya saba na Halmashauri nane ambazo zote zinahitaji kupata Miji rafiki kutoka katika nchi zao kwa ajili ya kubadilisha na uzoefu katika sekta mbalimbali ili kukwamua uchumi wa Mkoa kwa kushirikiana na watu wengine.

Ujio huo unatarajiwa kuhusisha kikao ambacho kitawaonesha na kuwapitisha mambo yote ya Mkoa wa Dodoma, baada ya hapo watatoka na kwenda kujionea mambo hayo wakianzia Hospitali ya Benjamin Mkapa, Mji wa Serikali Mtumba na kuishia Kiwanja cha Ndege Msalato.

Ziara hiyo imeandaliwa kwa kutambua mchango wa Rais Mhe. Dkt. Samia Suluhu Hassan ambaye amejenga mahusiano mazuri na nchi zote Duniani zinazowafanya wafurahie kuja Tanzania na haya yote wamekua wakiyafanya katika nchi mbalimbali hivyo sasa ni zamu ya Dodoma.

Kaulimbiu: “Dodoma ipo Tayari kwa Ajili yenu”

#dodomawearereadyforyou

#takedodomatotheworldandbringtheworldtododoma

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu