KIDATO CHA SITA WAASWA KUPAMBANA NA RUSHWA

Imetumwa : March 4th, 2023

Mkuu wa Mkoa wa Dodoma Mhe.Rosemary Senyamule ametoa rai kwa wahitimu wa kidato cha sita kuwa mfano kwa vitendo katika kupambana na Rushwa.

Ameyasema hayo leo tarehe 04/03/2023 wakati wa mahafali ya wahitimu wa kidato cha sita kikundi (Club) cha TAKUKURU Mkoa wa Dodoma yaliyofanyika katika Shule ya Sekondari ya Dodoma na kuongozwa na kaulimbiu “Kuzuia Rushwa ni Jukumu Lako na Langu, Tutimize Wajibu Watu”

Senyamule amesema kuhitimu ni kiashiria tosha kwa wanafunzi hao kuwa wamefundishwa na kuelewa Rushwa na Madhara yake vile vile kukidhi vigezo na kuwa mstari wa mbele katika kukataa kushiriki katika vitendo vyovyote vya rushwa na kuikemea.

"Mhitimu unapoendelea na masomo ya juu au akienda mtaani anapaswa kuwa Mfano kwa vitendo wa kupingana na Rushwa, ambavyo ni tabia njema , Uadilifu, Utii naushiriki wa dhati kulingana na ratiba ya klabu ilivyo kuwa katika kipindi chote cha uwanachama wenu hatutarajii kuwa watu wakupenda Mafanikio ya mkato bali kuwa Mfano bora kwa kuelewa mafanikio huja kwa kufanya kazi kwa bidii kwa kuzingatia maadili na kufahamu haki zote za kiraia. Senyamule alisisitiza.

“Nyie ni watu muhimu sana katika Taifa Letu la Tanzania katika kuelimisha wengine juu ya Rushwa, penye rushwa hamna haki, hakuna Maendeleo na hakuna usawa. Madhara ya rushwa ni makubwa kuna ujenzi chini ya kiwango, Miradi hewa ya Maendeleo, huduma za jamii duni ,ubadhirifu wa Fedha za umma na Miundo mbinu mibovu" Amesema Senyamule

Kwa upande wake mkuu wa TAKUKURU Dodoma Bw. Sostenes Kibwengo amesema Wanafunzi 440 wa shule 6 ambazo ni Dodoma Sekondari, Msalo ,Bihawana, Maria de Mathis, Jamhuri na Meliwa wa kidato cha sita wamefanikiwa kuhitimu.

Amesema tunategemea kuwa wahitimu hawa watakuwa vinara wakuzuia rushwa na tutaendelea kufanya programu mbalimbali ili kuweza kuelimisha jamii juu ya kubaini rushwa na kuwa chachu ya Maendeleo .