KUBORESHA LISHE NGAZI YA KAYA; KAMATI YA LISHE MKOA WA DODOMA YADHAMIRIA KUWA MFANO

Imetumwa : May 18th, 2025

Kamati ya Lishe Mkoa wa Dodoma ikiongozwa na Katibu Tawala Mkoa wa huu  Bw. Kaspar K. Mmuya  Mei 18,2025 imefanya ziara ya kutembelea makazi ya baadhi ya wajumbe wa kamati hiyo,lengo likiwa ni kuona namna wanavyoyaishi yale ambayo wanawaelekeza na kuwahamashisha Wananchi kuyafanya ili kuboresha hali ya lishe katika kaya zao, mkazo ukiwa kwenye upandaji wa miti ya matunda na mbogamboga.

Wajumbe waliotembelewa ni  Bi. Aziza Mumba,ambaye ni Katibu Tawala Msaidizi Sekisheni ya Uchumi na Uzalishaji pamoja na Mhasibu Mkuu wa Mkoa, CPA.Lundgreen Mcharo.

Akizungumza mara baada ya ziara hiyo,Katibu Tawala amewapongeza Wajumbe hao kwa kukubali kutembelewa lakini pia kwa kile wanachokifanya,ambacho ni darasa kubwa kwa kamati hiyo.

" Kwanza niwapongeze kwa hiki mnachokifanya ambacho ni kikubwa.Lakini sasa nataka mkitazame kwa jicho la kibiashara,pamoja na lishe,kuna hela hapa,".

Katika hatua nyingine,Katibu Tawala Mmuya amewatia moyo Wanakamati wengine  ambao bado hawajaanza kufanya shughuli hizo za kilimo na ufugaji,kwamba wanaweza kuanza hata kwa udogo.

"Najua baada ya kuona haya,wengine mmechanganyikiwa kabisa.Hapo mlipo mnawaza mambo mengi sana,lakini hata kama uko kwenye nyumba ya kupanga,bado unaweza kupanda mboga mboga kwenye makopo,unaweza kupanda miti ya matunda.Labda utasema nyumba sio yako.Lakini jibu ni moja tu,hata hapa tuliposimama,ni chini ya miti,lakini hatukuipanda sisi, kwa hiyo wewe panda tu,hata kama nyumba unayoishi siyo ya kwako.

Ziara hiyo ni endelevu,hivyo itaendelea kulingana na ratiba itakavyopangwa.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu