KUMBUKENI THAMANI YA UHAI WA BINADAMU; RAS MMUYA

Imetumwa : January 13th, 2025

Na. Sizah Kangalawe

Habari- Dodoma Rs.

Kauli hiyo imetolewa na Katibu Tawala Mkoa wa Dodoma Bw. Kaspar K.Mmuya wakati akifungua kikao kazi cha kupanga namna bora harakishi na jumuishi ya kuwatafuta na kuwaibua wagonjwa wa kifua kikuu, kikao ambacho kimewajumuisha Waganga Wakuu wa Wilaya, Waratibu wa Kifua Kikuu na UKIMWI, Waratibu wa kifua kikuu na Ukoma pamoja na Wataalamu wa Maabara kutoka halmashauri 7 za Mkoa wa Dodoma.

Kikao hicho kimefanyika Januari 13/2025  katika ukumbi wa Ofisi ya Mkemia Mkuu wa Serikali Jijini Dodoma.

Akizungumza wakati akifungua kikao hicho Mmuya amesema " Wote tunaujua ugonjwa wa kifua kikuu, usipoweza kumtambua mgonjwa mmoja, ana uwezo wa kuwaambukiza watu 15 hadi 20  kwa mwaka mmoja Ndio sababu tunasisitiza wagonjwa watambuliwe mapema.Leo mmekutana wataalamu hapa, jadilianeni mtoke na mbinu zitakazowawezesha kwenda kuwatambua na kuwaibua wagonjwa  1,930 ndani ya muda uliowekwa.

 Aidha RAS Mmuya ametaja takwimu za ugonjwa huo Kidunia na Kitaifa ambapo amesema " kwa mujibu wa Shirika la Afya Duniani, mwaka 2023 kulikuwa na wagonjwa Milioni 10. 8, kati ya hao Wagonjwa Milioni 1.25 walifariki, Mwaka 2024  Tanzania ilikuwa na wagonjwa 122,000 ambapo wagonjwa 18,400 walifariki.

"Idadi hiyo ya vifo ni kubwa sana, hii si sawa, nguvu kazi ya Taifa imepotea na kilichoniuma  zaidi ni kwamba tuna uwezo wa kuokoa maisha yao kwa sababu dawa za kutibu zipo.

"Mhe. Rais anawekeza fedha nyingi sana kwenye kujenga nguvu kazi kuleta tija kwenye sekta ya Afya, na sisi tumuunge mkono kwa kufanya kazi kwa bidii ili Taifa liweze kupata matokeo tarajiwa. Kumbukeni thamani ya uhai wa binadamu", Amesema Mmuya

Katibu Tawala huyo ameongeza  kuwa ni muhimu kufahamu takwimu za ugonjwa, ili kuongeza jitihada za  kukabiliana nao.

Kikao hicho maalum ni utekelezaji wa mpango harakishi wa kuibua wagonjwa wa kifua kikuu katika halmashauri 76 za mikoa 9  uliozinduliwa Januari 06,2025 na Waziri wa Afya Mhe. Jenista Mhagama katika kituo cha Afya  Chamwino, kilichopo wilayani Chamwino wakati akikabidhi mashine za utambuzi na ugunduzi wa Ugonjwa wa kifua kikuu.