RC DKT. MAHENGE AZITAKA HALMASHAURI ZOTE MKOANI DODOMA KUTENGA FEDHA ZA KUTEKELEZA AFUA ZA LISHE KUPAMBANA NA UTAPIAMLO

Imetumwa : February 7th, 2020

Mkuu wa Mkoa wa Dodoma Dkt Binilith Mahenge amezitaka Halmashauri za mkoa wa Dodoma kutenga fedha ili kukabiliana na utapiamlo na lishe duni kwa watoto walio chini ya umri wa miaka mitano kutokana na tathmini kuonyesha kuwa watoto 9,767 wanakabiliwa na suala la lishe duni.

Dk Binilith Mahenge ametoa kauli hiyo leo jijini Dodoma wakati akifungua kikao cha kutathmini utekelezaji wa mkakati wa lishe kwenye mkoa wa Dodoma kwa kipindi cha mwezi Julai hadi Disemba mwaka 2019, kikao kilichohudhuriwa na viongozi wa Wilaya na Halmashauri zote za Mkoa wa Dodoma, wataalamu wa masuala ya lishe kutoka Halmashauri zote za Dodoma na wadau mbalimbali wanaounga mkono programu za lishe kwenye Mkoa wa Dodoma.

Dk.Mahenge amesema kuwa kila halmashauri imetenga kwenye bajeti kiasi cha fedha kwa ajili ya kukabiliana na suala la lishe duni kwa akina mama wajawazito na watoto walio chini ya miaka mitano lakini utekelezaji wake umekuwa wa kusuasua.

“Kila Halmashauri inatakiwa kutenga sh 1,000 kwa kila mtoto kwa ajili ya kukabiliana na utapiamlo kwa watoto walio chini ya miaka mitano lakini cha kusikitisha kuna baadhi ya Halimashauri hazitekelezi agizo hili hali inayoturudisha nyuma kwenye suala zima la mapambano dhidi ya utapiamlo,” amesema Dk.Mahenge

Aidha ametoa agizo kwa wale wote wanaohusika na utoaji wa mafungu ya fedha za kukabiliana na tatizo la lishe duni kwa kila Halmashauri kufanya hivyo ili tukikutana tena mwezi wa sita mwaka huu tuwe tumefanya vizuri zaidi.

Awali Afisa lishe wa mkoa wa Dodoma, Heriet Carin amesema kuwa jumla ya Sh 543.88 milion zilitengwa kwa ajili ya kukabiliana na utapiamlo kwa watoto chini ya miaka mitano kwa mwaka 2019/20 lakini fedha zilizotolewa ni Sh 120.74 milioni ambazo ni sawa na asilimia 48 ya fedha yote iliyotengwa.

Bi.Carin amesema kuwa tathmini iliyofanywa na Mkoa ili kugundua watoto wenye utapiamlo mkali, udumavu na uzito mdogo uligundua kuwa kulikuwa na watoto 9,767 waliokuwa wanakabiliwa na suala la lishe duni mkoani hapa.

”Hivyo Halmashauri zote natazitaka zitoe kipaumbele katika masuala ya lishe kwenye bajeti zao ili kukomesha utapiamlo na kutengeneza kizazi chenye afya njema kwa maendeleo ya Taifa”amesema Bi.Carin

Mkuu wa Mkoa Dkt. Mahenge alitumia kikao hiko cha tathimini ya masuala ya Lishe pia kuzindua kitabu cha Mkakati wa lishe wa Mkoa wa Dodoma na kuwagawia makundi yote muhimu yanayoshirikiana kuratibu masuala ya lishe Mkoani Dodoma kuanzia Sekretarieti ya Mkoa, Viongozi wa Wilaya zote za Mkoa wa Dodoma na Halmashauri zote kwenye Mkoa wa Dodoma na wadau wa Lishe.