RC SENYAMULE AFANYA UKAGUZI WA MIRADI YA HALMASHAURI YA DODOMA JIJI

Imetumwa : October 20th, 2022

RC SENYAMULE  AFANYA UKAGUZI WA MIRADI YA HALMASHAURI YA DODOMA JIJI

Ikiwa ni mwendelezo wa ziara za kutembelea miradi na kufanya vikao na watumishi pamoja na wananchi wa Halmashauri za Mkoa wa Dodoma, Mkuu wa Mkoa Mhe. Rosemary Senyamule amefanya ziara ya ukaguzi wa miradi inayotekelezwa na Halmashauri ya Dodoma Jiji.

Katika ziara hii Mkuu wa Mkoa ameambatana na Katibu Tawala Mkoa Dkt. Fatuma Mganga, Kamati kuu ya Ulinzi na Usalama Mkoa, Mkuu wa Wilaya ya Dodoma Jiji Mhe. Jabir Shekimweri pamoja na wakuu wa Taasisi pamoja na Idara mbalimbali za Ofisi ya Mkuu wa Mkoa Mkoa. Ziara hiyo imeanzia kwenye ukaguzi wa miradi ya maendeleo ikiwemo ujenzi wa kituo cha afya cha Nkuhungu.

Ujenzi wa Kituo hiki cha afya unafanbyika katika eneo lenye  ukubwa wa SQM 14,000, mpaka kukamilika kwake mradi huu unatarajiwa kugharimu kiasi cha Tsh Milioni 210 ambazo ni fedha kutoka kwenye mfuko wa mapato ya ndani ya Halmashauri. Aidha kituo hicho kitasaidia kupunguza changamoto ya wakazi wa eneo hilo kufuata huduma za afya umbali mrefu. Ujenzi unatarajiwa kukamilika mwishoni mwa mwezi Desemba mwaka huu.

Baada ya Nkuhungu, Mkuu wa Mkoa na msafara wake wametembelea mradi wa ujenzi wa vyumba viwili vya madarasa pamoja na mabweni mawili katika shule ya sekondari ya wavulana ya Bihawana  ambapo ujenzi huo unagharimu shilingi Milioni 240 na umeanza kutekelezwa toka tarehe 11 Julai 2022 na unatarajiwa kukamilika tarehe 30 Novemba 2022.

Mradi mwingine uliotembelewa na msafara wa Mkuu wa Mkoa ni ujenzi wa shule ya msingi Msangalale ambayo ni ya Serikali itakayotumia mtaala wa Kiingereza inayojengwa katika eneo la Mapinduzi East, Msangalale - Dodoma Makulu. Mradi wa ujenzi unagharimu Tsh Milioni 750 zilizotoka kwenye Taasisi ya Elimu nchini (TEA). Mradi wa shule hii ya kisasa unatarajiwa kukamilika mwezi Novemba, 2022 na inatarajiwa kuanza kufundisha Januari 2023.

Shule ya sekondari Mtemi Chiloloma inayopatikana katika Kata ya Hombolo Makulu, ndio mradi wa mwisho kutembelewa na msafara huu ambapo shule hiyo mpya inatarajiwa kuwa na madarasa manne (4), mabweni matatu (3), matundu 20 ya vyoo na majengo mengine. Mradi ulianza kutekelezwa Januari 2022 na unatarajiwa kukamilika Mwezi Novemba 2022. Tayari shule imeanza Oktoba 10 mwaka huu kwa kupokea wanafunzi 142 wa kidato cha kwanza.

Mhe. Senyamule ametoa pongezi kwa Halmashauri ya Jiji kwa kuanzisha miradi hiyo ambayo itasaidia kusukuma gurudumu la maendeleo kwa nchi yetu licha ya kuwataka kuikamilisha kwa wakati kama walivyoahidi ili kuleta tija licha ya changamoto kadhaa zilizojitokeza katika utekelezaji wake, aidha amewataka kuhakikisha kuwa wanakabiliana na changamoto huku Serikali ya Mkoa ikitoa ushirikiano wa karibu kuhakikisha miradi hiyo inakamilika kwa wakati.

MWISHO