RC SENYAMULE ATEMBELEA MAJERUHI WA AJALI LA LORI NA BASI

Imetumwa : September 18th, 2025

_ awataka madereva kuzingatia sheria za usalama barabarani

Na Sofia Remmi,

Habari-DodomaRs.

Mkuu  wa Dodoma Mhe.Rosemary Senyamule leo tarehe 18 Septemba 2025 amewatembele majeruhi wa ajali ya lori na basi iliyosababisha vifo vya watu 09 na majeruhi 16 baada ya basi walilokuwa wakisafiria kugongana na lori eneo la Kambi ya Nyasa wilaya ya Chemba mkoani Dodoma.

Akizungumza baada ya kutembelea majeruhi waliolazwa katika hospitali ya rufaa ya Mkoa wa Dodoma.Mhe. Senyamule amesema,

Majeruhi wengine walipelekwa hospitali ya wilaya ya Chemba ambapo majeruhi wanne walifariki njiani na wengine walifariki wakiwa hospitali hapo na kusababisha vifo kufikia tisa 09 na majeruhi 16,majeruhi tisa walihamishiwa katika hospitali ya Rufaa ya Mkoa wa Dodoma kwa ajili ya matibabu zaidi.

‘Tumesikitika kupoteza Watanzania wenzetu kutokana na ajali hiyo mbaya, tunashukuru waliokuwa mstari wa mbele kuokoa waliopata ajali na hata kusafirisha salama majeruhi wengine kufikishwa hospitali ya Rufaa ya mkoa wa Dodoma

Eneo lililotokea ajali ni eneo ambalo kama madereva wangekuwa makini,haikupaswa kutokea ajali kwa sababu,ni  barabara ya lami iliyonyooka, ni eneo salama ambalo kila moja ana uwezo wa kumuona mwenzake”Amesema Senyamule

Aidha,Mhe. Senyamule ametoa  wito kwa madereva kuzingatia sheria na kuwa makini.

'' ukiona usingizi unakuja simamisha gari ili upumzike, tungetamani maeneo yote watu wasafiri salama".Amesisitiza Mhe. Senyamule.

Kwa upande wake  Kamanda wa Polisi Mkoa wa Dodoma Gallus Hyera amethibitisha kutokea kwa ajali hiyo iliyotokea leo saa 1:40 asubuhi, ambapo basi linalojulikana kama Babu Trans lenye namba za usajili T.129 DVX aina ya Tata likitokea Kondoa kwenda Dodoma kugongana uso kwa uso na lori namba T.907 EJZ lililokuwa likitokea Dodoma kwenda Kondoa..

Amesema kuwa kati ya waliopoteza maisha ni dereva wa basi hilo pamoja na wanafunzi wanne, huku dereva wa lori akiwa miongoni mwa majeruhi.

Aliwataja wanafunzi waliofariki katika ajali hiyo kuwa ni  Caroline Joackim (13), Rukia Ally (14), Bashiru Hashim (13) na Nasra Mohamed (18).

Kamanda Hyera amesema kulingana na maelezo ya majeruhi na mashuhuda wa ajali hiyo, dereva wa lori alihama upande wake na kwenda upande wa kulia na kugongana uso kwa uso na basi.

Alitoa wito kwa madereva kuzingatia sheria za usalama wa barabarani kwani matukio ya uzembe yamekuwa yakigharimu maisha ya watu.

Mganga mfawidhi wa hospitali ya rufaa ya Dodoma Ibenzi Ernest amesema kuwa wamepokea majeruhi tisa,

“Kuna baadhi wameumia kwenye miguu, mikono na baadhi wameumia kwenye kichwa,” Amesema.