RC SENYAMULE AZIELEKEZA TARURA NA TANROADS KUZIBUZ MIFEREJI YA MKONDO WA MAJI YA MVUA

Imetumwa : December 7th, 2023

Mkuu wa Mkoa wa Dodoma Mhe.Rosemary Senyamule amezielekeza taasisi zinazohusika na ujenzi wa mifereji ya barabara ambazo ni Wakala wa Barabara za Vijijini na Mijini (TARURA) na Wakala wa Barabara Tanzania (TANROADS) kuhakikisha miferejii inazibuliwa na kutolewa uchafu wote ili kuruhusu maji kupita kwa haraka na kusaidia kupunguza athari zinazoweza kuletwa na mafuriko.

Maelekezo hayo yametolewa Disemba 6,2023 wakati wa ziara yake ya kikazi ya ukaguzi wa Miradi ya barabara za TARURA katika Halmashauri ya Wilaya ya Chamwino.

Mhe.Senyamule ametoa shime kwa wakandarasi kufanya kazi kwa kuzingatia ubora na wakati bila kujali hali ya hewa ya sasa kwani wakati wanasaini mikataba walikuwa wanajua watafanya kazi kwa nyakati zote za masika na kiangazi.

"Lakini tunajua muda huu tunaojenga ni muda wa mvua sasa tusiwe na sababu nyingi tangu wakandarasi wanasaini mkataba walijua kutakuwa na mvua kwa kujua wataanza lini na kumaliza lini ,hatutegemei mvua ikawa ndio sababu ya kutoa maelezo mengi ya kuchelewesha mradi .

"Lakini kikubwa nacho sisitiza ni uimara wa miradi Tunachotegemea watazingatia "amesema Senyamule

Katika Hatua nyingine, Mhe.Senyamule amesisitiza suala la mazingira katika kila barabara zinazojengwa sasa hivi kuhakikisha zinapandwa miti pembezoni ikiwa ni sehemu ya utekelezaji wa agizo la Ofisi ya Makamu wa Rais Muungano na Mazingira la kutunza mazingira na kupendezesha barabara zenyewe.

"Nitoe wito kwa wakandarasi wote kabla hawajaondoka saiti lazima TARURA mjiridhishe kama miti imepandwa na kustawi pembezoni mwa mwabarabara " Amesisitiza Senyamule

Kadhalika,ameendelea kuhimiza kuchukua tahadhari za kujikinga na madhara yatakayoweza kujitokeza kutoka na mvua zinazo tarajiwa kunyesha kwa mujibu wa Mamlaka ya hewa nchini (TMA ) .

Katika ziara hiyo amefanikiwa kukagua barabara zenyewe urefu wa Kilometa 6.95 zinazojumuisha barabara ya Abeid Amani Karume 0.70km,Robina 0.65km, Malecela 1.80 Km, Ally Hassan mwinyi 1.00 Km, Rashidi Kawawa 1.90 Km na Mshikamano 0.9 Km pamoja na matengenezo ya barabara yenye jumla ya Km 1,396.73 ambapo Km 7.045 ni lami ,Km 550.065 ni tabaka la Changarawe na kiasi cha Km 839.62 ni tabaka la udongo sambamba na daraja lenye njia tatu za kupisha maji katika kijiji cha kihegea na daraja la mawe linalojengwa katika Kijiji cha Dabalo.