“UTANGAZAJI: NGUZO YA MAADILI MEMA NA USALAMA WA NCHI “ - PROF. KABUDI

Imetumwa : February 13th, 2025

Na: Hellen M. Minja,

Habari - DODOMA RS

Kupitia malengo ya Utangazaji na vyombo vya Habari kwa ujumla ambayo ni kuhabarisha, kuelimisha na kuburudisha, Serikali Duniani zimekua zikitumia vyombo vya habari kuwasiliana na wananchi wake kuhusu Programu mbalimbali za Kitaifa na kuwahamasisha kushiriki katika miradi mbalimbali ya maendeleo.

Hayo yamebainishwa na Waziri mwenye dhamana ya Habari, Utamaduni, Sanaa na Michezo Mhe. Prof. Palamagamba Kabudi alipokua akizundua rasmi Mkutano wa Mwaka wa Vyombo vya Utangazaji Nchini unaofanyika kwenye ukumbi wa 'New Generation' Jijini Dodoma.

Katika hotuba yake, Waziri Prof. Kabudi amesema; "Serikali nyingi Duniani zimekua zikitumia vyombo vya habari kuwasiliana na wananchi wake kuhusu Programu mbalimbali za Kitaifa na kuwahamasisha kushiriki miradi mbalimbali ya maendeleo. Hivyo, Redio ni chombo sahihi sana katika kufikisha habari kwa wananchi, kulinda maadili na usalama wa Nchi."

Kadhalika, Katibu Mkuu Wizara ya Habari, Utamaduni, Sanaa na Michezo ambaye pia ni Msemaji Mkuu wa Serikali Bw. Gerson Msigwa ameipongeza Mamlaka ya Mawasiliano Tanzania (TCRA) kwa kuandaa afua mbalimbali ambazo zinawasaidia Watangazaji wa leo kupata mazingira bora ya kufanya kazi zao kwa weledi.

Katika hatua nyingine, Mkurugenzi Mkuu wa Mamlaka ya Mawasiliano Tanzania (TCRA) Dkt. Jabir Kuwe, amesema sekta ya Utangazaji imepitia mabadiliko makubwa kutokana na Teknolojia mpya kuingia sokoni hivyo Serikali kupitia TCRA imelazimika kufanya mabadiliko ya kanuni za Utangazaji mara kwa mara ili kukabiliana na changamoto za teknolojia hiyo.

Akitoa salamu za Mkoa wa Dodoma, Mkuu wa Mkoa huu Mhe. Rosemary Senyamule  amevishukuru Vyombo vya Habari kwa kutangaza na kuandika mambo mazuri ya Mkoa huu ambao ni Makao Makuu ya Nchi,hata ikasikika Duniani na kuifanya Dunia kuja kuwekeza Dodoma hivyo, ameahidi ushirikiano wa karibu kati ya Serikali ya Mkoa na Waandishi wa Habari.

Mkutano wa Mwaka wa Vyombo vya Utangazaji Nchini 2025, hufanyika kila mwaka sambamba na siku ya Redio Duniani ambayo inaenzi uasisi wa utangazaji ambao ulianzia kwenye chombo cha Redio ambapo baadae vilifuata vingine mpaka leo tunaposhuhudia teknolojia mpya kwenye tasnia ya Utangazaji.

Kauli mbiu: "Redio na mabadiliko ya tabia ya nchi".

#dodomafahariyawatanzania

#keroyakowajibuwangu

#birthdayyangumtiwangu