VETA YA SASA SI YA ZAMANI MATTAKA

Imetumwa : June 11th, 2024

Chuo cha mafunzo ya ufundi stadi (VETA) Kanda ya Kati, kimeimarika kwa sasa kufuatia uboreshaji wa mitaala inayokidhi teknolojia kutokana na ushindani wa soko la ajira. Hayo yamebainishwa na Kaimu Mkurugenzi wake Bw. Ramadhani Mattaka kwenye kipindi maalumu cha ‘Mitatu Dodoma na Samia’ kwa Taasisi za umma Mkoa wa Dodoma.

Kaimu Mkurugenzi huyo, ameipongeza Serikali kwa mafanikio makubwa ya VETA kwani imekua na utofauti mkubwa kutoka ile ya awali na hii ya kipindi hiki.

“VETA ya sasa si ya zamani. Serikali ya awamu ya sita imesaidia uboreshaji wa mitaala inayokwenda sambamba na mabadiliko ya teknolojia na ushindani wa soko la ajira nchini. Maboresho haya ni pamoja na kuongezeka kwa vifaa vya kisasa vinavyokidhi mitaala hii” Amesema Bw. Mattaka

Mafanikio mengine ambayo Serikali imeyafanya kwa Taasisi yake, amesema Serikali inachangia ada kwa wanafunzi wa bweni ambapo kila mwanafunzi analipia 120,000 kwa mwaka ambapo gharama halisi ni shilingi 900,000. Hivyo Serikali inatoa kiasi cha shilingi Bilioni 1.6 kwa ajili ya ada kila mwaka kwa vijana wa kitanzania.

Aidha, Serikali imetoa fedha zaidi ya Bilioni 12 kwa ajili ya upanuzi wa vyuo vya ufundi stadi Mkoa wa Dodoma ambapo kwa sasa itafikisha vyuo 7 kutoka chuo kimoja.

“Mkoa wa Dodoma ulikua na Chuo kimoja cha VETA lakini katika kipindi hiki, fedha zimetolewa takribani Bilioni 12 kwa ajili ya ujenzi wa vyuo vya VETA ambapo kila Wilaya itakua na chuo kimoja na ujenzi unaendelea. Hii inadhihirisha namna Rais anayodhamiria kutoa umasikini kupitia VETA” Bw. Mattaka.

Chuo cha ufundi stadi VETA kimeundwa kwa mujibu wa sheria za Tanzania mwaka 1994 kwa lengo la kutoa mafunzo ya ufundi stadi kutokana na wimbi la ukosefu wa ajira kwa vijana nchini. VETA kanda ya kati ni mojawapo ya Kanda 9 za vyuo hivyo ambapo kwa sasa ina vyuo 9 (Vitatu vya Mkoa na sita vya Wilaya huku ikihudumia mikoa Mitatu (Dodoma, Singida na Manyara).