VIJANA NI RASILIMALI MUHIMU KWA TAIFA KUFIKIA MALENGO YA DIRA 2050

Imetumwa : August 12th, 2025

Na. Hellen M. Minja

       Habari – DODOMA RS

Vijana wanatajwa kuwa rasilimali muhimu inayotegemewa na Taifa katika kufikia malengo ya Dira 2050 iliyozinduliwa mwezi Julai 2025 na Rais wa Jamhuri ya Muungano wa Tanzania Mhe. Dkt. Samia Suluhu Hassan.

Hayo yamebainishwa na Naibu Katibu Mkuu Ofisi ya Waziri Mkuu Kazi, Vijana, Ajira na watu wenye Ulemavu Bi. Zuhura Yunus alipokua akizungumza na vijana waliojitokeza kwenye Maadhimisho ya Siku ya Vijana Kimataifa 2025 yaliyofanyika leo Agosti 12, 2025 kwenye ukumbi wa Mabelle uliopo Jijini Dodoma.

“Vijana ni rasilimali muhimu ambayo inategemewa na Taifa katika kufikia malengo na Dira ya Taifa 2050 ambayo imezinduliwa Julai 2025, natumai wote mmeshuhudia, ile hasa ni kwa ajili ya vizazi vyenu. Kuwawezesha vijana kushiriki kikamilifu katika kuchochea maendeleo ya jamii na Taifa ni suala la muhimu na lisiloepukika”. Bi. Yunus

Akitoa salamu za Mkuu wa Mkoa wa Dodoma Mhe. Rosemary Senyamule, Kaimu Katibu Tawala Mkoa wa Dodoma CPA. Eric Ntikahera amesema Taifa linawategemea vijana kwani ni nguvu kazi na tegemeo la maendeleo kulinga na Dira 2050 hivyo amewataka kuisoma na kuielewa kwani sehemu kubwa kama nchi inawategemea.

Nae Mwakilishi wa Shirika la Maendeleo la Kimataifa (UNDP) Bw. Joseph Manirakiza, amesema maendeleo endelevu hayawezekani bila vijana kwani Miradi wanayoifanya kama Shirika, inalenga kufikia maendeleo endelevu kwa ajili yao hivyo, wametakiwa kutoa sauti na kutumia nguvu zao katika kulijenga Taifa.

Tanzania ikiwa ni Mwanachama hai wa Umoja wa Mataifa, inaungana na Jumuiya nyingine za Kimataifa kuadhimisha siku ya Vijana Kimataifa 2025 inayotambua na kuthamini mchango wa Vijana katika maendeleo ya jamiii, Taifa na Duniani kwa ujumla. Tanzania inaadhimisha siku hiyo chini ya kaulimbiu: “Nguvu kazi ya Vijana Tanzania, Kwa Maendeleo Endelevu”

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu