VIONGOZI WA SERIKALI WAASWA KUTEKELEZA DIRA 2025 ILI KUKUZA KILIMO IFIKAPO 2030

Imetumwa : August 1st, 2025

Na. Hellen M. Minja

       Habari – DODOMA RS

Mwongozo mpya wa kuanzisha na kuendesha Shamba Darasa la Kilimo biashara uliozinduliwa leo Agosti Pili, 2025 na Wizara ya Kilimo kwa ufadhili wa Shirika la ‘Care International’ Tanzania, unatajwa kuwanufaisha Wakulima na Wadau wanaojihusisha kwa namna moja ama nyingine na shughuli za sekta ya kilimo.

Hayo yamebainishwa na Katibu Mkuu wa Wizara ya Kilimo Bw. Gerald Mweli wakati wa Kongamano la uzinduzi wa Mwongozo huo lililofanyika kwenye ukumbi iliopo ndani ya viwanja vya Nzuguni Jijini Dodoma katika Maonesho ya Nanenane Kitaifa 2025 Kanda ya Kati.

“Leo tunahitimisha mchakato wa kuandaa Mwongozo ili kuhakikisha huduma za ugani zinaendana na mahitaji ya sasa, mwongozo huu utawanufaisha wakulima, vyama vya ushirika, wataalam wa kilimo, taasisi za Umma na binafsi, kampuni za pembejeo, taasisi za fedha wabia wa maendeleo na wajasiriamali waliojipanga kuendeleza teknolojia mbalimbali za kilimo”  Bw. Mweli.

Aidha, Balozi wa Indonesia Nchini Tanzania Mhe. Tri Yogo Jatmiko aliyehudhuria Kongamano hilo amesema uchumi wa Taifa lake unategemea Kilimo na wanatumia teknolojia za kisasa kama kutengeneza mvua kupitia mawingu hivyo, hawategemei kilimo cha mvua za msimu na kufanya sekta hiyo kuwa na mchango wa 60% katika Pato la Taifa.

Akizungumza kwa niaba ya Mkuu wa Mkoa wa Dodoma, Katibu Tawala Msaidizi Seksheni za Uchumi na uzalishaji Bi. Aziza Mumba, amesema wakati huu ambao Wizara inakwenda kutengeneza vituo vya zana za kilimo, izingatie changamoto wanayoipata wakulima hasa uwepo wa tabaka gumu la udongo linalozuia kutengeneza matuta ya kuhifadhia maji.

Vile vile, Mkurugenzi Mkaazi wa ‘Care International’ Tanzania Bi. Prudence Masako amesema Shirika lake linatekeleza miradi ya kilimo katika Mikoa ya Iringa, Mbeya, Njombe, Kigoma, Tanga, Shinyanga na Morogoro inayolenga wakulima wadogo hususan wanawake na vijana kwa lengo la kuwawezesha kutoka kilimo cha kujikimu hadi kilimo biashara.

Maonesho ya Nanenane 2025 yanaongozwa na Kaulimbiu: “Chagua Viongozi Bora kwa Maendeleo Endelevu ya Kilimo, Mifugo na Uvuvi 2025” ambayo ni mahsusi ili kukumbusha umuhimu wa kuchagua viongozi bora katika kuinua uzalishaji kwenye sekta za Kilimo, Ufugaji na Uvuvi kipindi hiki Taifa linapoelekea kwenye Uchaguzi Mkuu, Oktoba 29, 2025.

 #dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu