VYAMA VYA USHIRIKA VYAWANUFAISHA WAKULIMA KUPITIA MASOKO YA UHAKIKA YA MAZAO

Imetumwa : August 3rd, 2025

Na. Hellen M. Minja

       Habari – DODOMA RS

Imabainishwa kuwa, Wakulima sasa wameanza kunufaika na uwepo wa soko la uhakika la mazao yao kupitia kujiunga kwenye vyama vya Ushirika kwani, Tani Milioni 3.8 za mazao mbalimbali yenye thamani ya shilingi Trilioni 6.2, zimeuzwa kupitia vyama hivyo vilivyoanzishwa kwa lengo la kuwasimamia Wakulima nchini.

Waziri Mkuu wa Tanzania Mhe. Kassim Majaliwa, amebainisha hayo alipokua akizungumza na wadau pamoja na wanaushirika waliohudhuria Siku ya Ushirika leo Agosti Tatu, 2025 kwenye Kijiji cha Ushirika kinachopatikana ndani ya Maonesho ya Nanenane Kitaifa 2025 Kanda ya Kati katika viwanja vya Nzuguni Jijini Dodoma.

“Tani Milioni 3.8 za Mazao mbalimbali ya yenye thamani ya shilingi Trilioni 6.2 zimeuzwa kupitia vyama vyetu vya Ushirika tulivyo navyo, hii ina maana kwamba Wakulima wameanza kupata masoko mazuri ya uhakika, bei nzuri kwenye masoko yetu na tumepanua wigo wa masoko hivi sasa ili Mkulima awe na uhakika na zao lake kupata soko”.

Aidha, Mkuu wa Mkoa wa Dodoma Mhe. Rosemary Senyamule, amesema kuwa Mkoa wake pia una mazao ambayo wakulima wake wamejiunga kwenye vyama vya Ushirika hivyo wanapata masoko ya uhakika wakiuza kupitia Mfumo wa Stakabadhi ghalani.

“Mkoa wa Dodoma tuna mazao ambayo yamejiunga katika Ushirika, tuna Korosho pale Kongwa na Mpwapwa ambazo wanazalisha kwa kiasi kikubwa na wana chama cha Ushirika ambacho kinauza kwa njia ya Stakabadhi ghalani lakini pia tuna Zabibu ambayo pia ina chama cha Ushirika”.

Hata hivyo, Katibu Mkuu wa Wizara ya Kilimo Bw. Gerald Mweli, amesema maono ya Wizara yake kwa niaba ya Serikali, ni kuhakikisha vyama vya Ushirika ambavyo vinajishughulisha na uzalishaji, vinaanzia kwenye uzalishaji hadi sokoni kama ilivyo kwenye mazao ya Pamba na Korosho ambayo yanauzwa moja kwa moja kwenye masoko ya Kimataifa.

Nae, Mrajisi wa vyama vya Ushirika Dkt. Benson Ndyege amesema mali za ushirika zilizorudishwa ikiwa ni pamoja na viwanda, zimeanza kufanya kazi na kuwanufaisha wanaushirika na watanzania kwa ujumla na sasa wameleta utaratibu wa kuzitambua kidijitali ambapo wameshatambua mali 4,990 za ushirika zenye thamani ya takribani shilingi Trilioni 1 na mahali zilipo.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu