WAKANDARASI WASIOKAMILISHA MIRADI KUDAIWA FIDIA

Imetumwa : May 21st, 2025

Na. Sizah Kangalawe - Dodoma Rs

Waziri wa Ujenzi Mhe. Abdallah Ulega, amewataka Wakala wa  Barabara Nchini (TANROADS) na Taasisi nyingine zinazosimamia ujenzi wa miradi ya Serikali, kuwatoza faini wakandarasi wanaochelewa kukamilisha miradi hiyo baada ya mikataba yao kumalizika, ikiwa wameshapatiwa stahiki zao zote.

Agizo hilo limetolewa na Waziri huyo wakati wa ziara yake ya kikazi ya kukagua miradi mbalimbali  inayotekelezwa na Wizara hiyo kupitia kupitia TANROADS  Mei 21/2025 Jijini Dodoma.

‘’Hakikisheni tunawadai kwasababu sisi tumekuwa tukidaiwa kwenye miradi yetu pindi tukichelewesha jambo, kwahiyo inapotokea wao wamechelewa ni lazima na wao watulipe sisi  kwa muda ambao wamechelewa, kama msumeno vile, unakata pande zote kwetu na kwao.

Aidha Mhe. Ulega ameitaka TANROADS kushirikiana kwa karibu na Mamlaka ya Viwanja vya Ndege (TAA) ili kurahisisha utendaji kazi kwani baada ya kumalizika kwa ujenzi huo Mradi utakabidhiwa kwa TAA.

‘’TANROADS na TAA mpo hakikisheni  mnashirikiana kwa karibu kufanya hii kazi, hili jambo ni la Watanzania wote, ni kweli kazi ya ujenzi tumepewa sisi TANROADS na Mikataba yote lakini TAA ndio watumiaji na Watanzania wote, TAA akiona uzito wa mambo ninyi msimfungie milango kuona kwamba hawezi kutoa ushauri, msukumo. Inawezekana kuna jambo atakaloliona yeye kama mtumiaji , msimamizi wa baadae mradi ukikamilika, mkifunga milango atashindwa kuwashauri kitaalamu’’, Ameagiza Ulega

Kwa upande wake Mkuu wa Mkoa wa Dodoma Mhe. Rosemary Senyamule amewaomba Wizara ya Ujenzi kwa kushirikiana na TRC kujenga njia ya mchepuko ya muda ili kuwezesha bandari kavu kuanza kufanya kazi yake kama ilivyokusudiwa wakati ujenzi wa barabara kuu ukiendelea.

Ziara hiyo imehusisha kutembelea barabara ya mzunguko wa nje kutoka Ihumwa – Matumbulu na Matumbulu- Veyula ambapo ujenzi wake unatarajiwa kukamilika kati ya Julai 31 na Agosti 30/2025, Ujenzi wa Uwanja wa ndege wa kimataifa Msalato ambao utakuwa na uwezo wa kusafirisha abiria Milioni moja na laki tano kwa mwaka pamoja kuwa na uwezo wa kuegesha ndege 17 kwa wakati mmoja.

Hata hivyo miongoni mwa maagizo yaliyotolewa katika ziara hiyo ni pamoja na wakandarasi kufanya kazi usiku na mchana ili kukamilisha miradi kwa wakati na kuzingatia mahitaji ya watumiaji wadogo wa barabara pindi wanapojenga barabara ya juu ( Fly over) katika makutano ya barabara ya juu ya mzunguko wa nje Mtumba, jijini Dodoma.

#dodomafahariyawatanzania

#wekezadodomastawidhadodoma

#keroyakowajibuwangu

#mtiwangubirthdayyangu