MAMLAKA YA MAPATO YAPONGEZWA KWA UZINDUZI WA DAWATI MAALUM LA UWEZESHAJI BIASHARA

Imetumwa : September 11th, 2025

Na. Elizabeth S. Dai

 Habari-DODOMA RS

Mamlaka ya Mapato (TRA) imepongezwa kwa uamuzi wa kuzindua  Dawati Maalumu la Uwezeshaji Biashara linalotajwa kuwa chachu ya ulipaji kodi usiopingika kwa wananchi wa Mkoa wa Dodoma na Taifa kwa ujumla.

Hayo yamebainishwa na Mkuu wa Mkoa  wa Dodoma, Mhe. Rosemary S. Senyamule katika hotuba yake wakati wa hafla ya Uzinduzi wa Dawati hilo iliyoandaliwa na Mamlaka ya Mapato nchini (TRA) katika viwanja vya Nyerere Square jijini humu  Septemba 11, 2025.

“Lakini nipongeze pia sana leo kwa uamuzi huu wa kuzindua dawati maalumu la uendeshaji wa wafanyabiashara kwa Mkoa wa Dodoma ambalo litakua mahususi kwa ajili ya kuwafikia wafanyabiashara, kuwasikiliza na kuwawezesha katika mahitaji mbalimbali kwa haraka na ufanisi mkubwa”

Nae Mkuu wa Wilaya ya Dodoma Mhe. Jabir Shekimweri amepongeza Mamlaka ya Mapato kwa kuanzisha dawati hilo kwani litaondoa kero za wafanyabiashara na kuzishughulikia kwa haraka katika maeneo ambayo yana urahisi wa kufikika.

Aidha, Kamishna Mkuu wa Mamlaka ya Mapato Bw. Yusuph Juma Mwenda ameahidi kwamba TRA itaendelea kuwa rafiki wa wafanyabiashara wote kwa kutumia 4R za Mhe. Rais Dkt. Samia Suluhu Hassan zikimaanisha maridhiano, ustahimilivu, mageuzi na kujenga upya kwa kutoa elimu na kuhimiza wajibu wao kwa weledi na uadilifu  mkubwa.

Hafla hiyo imeambatana na kaulimbiu isemayo “Tunawatambua, Tunawasikiliza na Kuwawezesha” inayolenga kuwasikiliza na kuwajali wafanyabiashara wakubwa kwa wadogo.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu