WANAWAKE WAOMBOLEZAO KUKUTANISHWA KWENYE KONGAMANO KULIOMBEA TAIFA DODOMA

Imetumwa : July 16th, 2025

Na. Hellen M. Minja

       Habari – DODOMA RS

Katika kipindi hiki ambacho Taifa linaelekea kwenye uchaguzi Mkuu wa Viongozi wa Serikali, Wanawake waombolezao watakutanishwa katika Kongamano la siku tatu la maombi kwa kuwa wana kina cha maombi kinachowezesha nchi kuwa na Amani, kwani bila Amani hakuna jambo la maendeleo litakaloweza kufanyika.

Hayo yamesemwa na Mchungaji wa Kanisa la ‘Tanzania Fellowship of Churches’ Deborah Godfrey Malassy ambaye Kanisa lake limeandaa Kongamano la 16 la Wanawake waombolezao Kitaifa alipokua akizungumza kwenye Mkutano na Waandishi wa Habari uliofanyika kwenye ukumbi wa Ofisi ya Mkuu wa Mkoa wa Dodoma Julai 16, 2025.

“Wanawake waombolezao wana kina cha maombi kwa ajili ya Taifa letu, kama mnavyojua katika kipindi hiki cha uchaguzi mbele yetu, kuna watoto, familia, uchumi na mambo mengine, tunawakutanisha kina Mama kuomba na kuomboleza kwa ajili ya kuweka hali nzuri ya Amani kwani nchi bila Amani hatuwezi kukaa”

Kadhalika, hakuna kiingilio katika kushiriki Kongamano hilo litakaloongozwa na Mnenaji Mkuu Katherine Kahabi huku wengine wakiwa Mwalimu Wilbroad Prosper, Mwalimu Miriam Mulokozi, Mchungaji Deborah Kaisi na wenyeji Askofu Dkt. Godfrey Emmanuel Malassy pamoja na Mchungaji Deborah Malassy.

Mgeni rasmi katika Kongamano hilo siku ya ufunguzi anatarajiwa kuwa Waziri wa Nchi, Ofisi ya Rais, Menejimenti ya Utumishi wa Umma na Utawala Bora Mhe. George Simbachawene huku siku ya kufunga akitarajiwa Mkuu wa Mkoa wa Dodoma Mhe. Rosemary Senyamule.

Kongamamo hilo lilianza rasmi mwaka 2009 na hufanyika mara moja kwa mwaka likitokana na Mkesha mkubwa wa Dua maalum ambao hufanyika Desemba 31 kila mwaka, na mwaka huu linatarajiwa kufanyika katika ukumbi wa Mwalimu Nyerere, ndani ya Chuo cha Mipango Jijini Dodoma kuanzia tarehe 18 hadi 20 Julai, 2025.

Neno litakaloongoza Kongamano ni; YEREMIA 9:17-21

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu