WATANZANIA WAASWA KUTUNZA TUNU AMANI KUELEKEA UCHAGUZI MKUU

Imetumwa : July 11th, 2025

Na Sofia Remmi,

Dodoma-Habari Rs

Watanzania wametakiwa kuendelea kuitunza Tunu ya amani wakati nchi ikielekea kwenye zoezi la Kitaifa la uchaguzi mkuu huku  Wanasiasa wakitakiwa kufanya kampeni za kistaarabu ambazo hazichochei hasira na vurugu zisizo na tija.

Mwenyekiti wa kamati ya maridhiano Mkoa Askofu Dkt. Venance Chande, ameyasema hayo leo Tarehe 11 Julai 2025, wakati wa Mkutano wa kutoa taarifa ya Kongamano lililoandaliwa na Idara ya Elimu ya Mahakama ya Kadhi na Baraza la Waislam Tanzania (BAKWATA) kwa kushirikiana na Ofisi ya Mkuu wa Mkoa wa Dodoma.

Askofu huyo amesema kuwa amani ndio msingi wa maendeleo ya Taifa lolote Duniani.

"Sisi Watanzania hatujazoea kugombana, tumezoea kuishi pamoja  kwa umoja na upendo, hatujazoea kubaguana kwa misingi ya makabila au dini zetu, hayo ndiyo maisha tuliyoyazoea kuishi".

Aidha, amewataka Wanasiasa kufanya siasa za kistaarabu.

"Wanasiasa, huu ni mwaka wa uchaguzi kampeni zifanyike kistaarabu zisiwe za kuchochea hasira, washawishi kwa Sera, tupingane kwa hoja na si kwa kuchochea vurugu zisizokuwa na tija kwa Taifa" Dkt. Chande

Kwa upande wake, Naibu Kadhi Shekhe Ally Nguruko, amesema kuwa lengo la kongamano hilo ni kujadili hatma ya nchi katika suala zima la amani kuelekea uchaguzi mkuu

vilevile mesema kuwa Kongamano hilo litakuwa la pili ambapo la kwanza lilifanyika Jijini Dar es salaam na linabeba kauli mbiu ya "Amani Yetu, Taifa Letu".

Ameongeza kuwa, miongoni mwa Mada zitakazotolewa katika ni pamoja na, athari za mitandao katika kuchangia kuharibika kwa amani, Afya duni ya akili na nyinginezo.

Aidha Kongamano hilo litakalofanyika Julai 13, 2025 katika ukumbi wa Sephil Sepphire Jijini hapa, linatarajiwa kufunguliwa na Mkuu wa Mkoa wa Dodoma Mhe. Rosemary Senyamule na kufungwa na Mkuu wa Wilaya ya Dodoma Mhe. Jabir Shekimweri.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu