WAZAZI WASISITIZWA KUPELEKA WATOTO SHULE KUFUATIA KUIMARIKA KWA MIUNDOMBINU YA ELIMU

Imetumwa : May 8th, 2025

Na. Hellen M. Minja

       Habari – DODOMA RS

Msisitizo unazidi kutolewa kwa wazazi wa Mkoa wa Dodoma juu ya umuhimu wa kuwapekeka watoto wao shule kwani Serikali ya awamu ya Sita inayoongozwa na Rais Mhe. Dkt. Samia Suluhu Hassan imewekeza fedha nyingi kwenye ujenzi na ukarabati wa miundombinu ya elimu katika Mkoa huu.

Hayo yamebainishwa na Mkuu wa Mkoa wa Dodoma Mhe. Rosemary Senyamule alipokua akizungumza na wakazi wa Kata ya Paranga, Halmashauri ya Wilaya ya Chemba Mei 08, 2025 katika Mkutano wa hadhara mara baada ya kutembelea na kukagua miundombinu ya shule na mabweni katika baadhi ya shule zilizopo Wilayani humo.

“Chemba ni moja ya Wilaya ambayo inatuvuta nyuma kwenye matokeo ya Mitihani ya mwisho. Kwa hiyo, kwenye elimu tusifanye mchezo, lindaneni wenyewe, hakikisha mtoto anakwenda shule, manufaa yake mtayaona, elimu inalipa wala haichelewi”. Amesisitiza Mhe. Senyamule.

Licha ya suala la elimu, Mhe. Senyamule amewahimiza wakati hao kuhusu suala la uchumi kupitia kilimo cha matunda hususan Matufaha (Apples) kwani utafiti umefanyika na kuonekana yanafanya vizuri katika ardhi ya Dodoma pia yana soko kubwa hivyo, matamanio ya Serikali ya Mkoa ni kuona mabadiliko ya uchumi kwa wananchi wake.

Akizungumza katika hadhara hiyo kabla ya kumkaribisha Mkuu wa Mkoa, Mkuu wa Wilaya ya Chemba Mhe. Halima Okash, amesema Serikali imefanya kazi kubwa kwa kuwekeza fedha nyingi katika Kata hiyo ambapo zaidi ya shilingi Bilioni 11.5 kwenye miradi ya Maji, Milioni 60 kwa ajili ya Maabara mbili, madarasa yenye thamani ya zaidi ya Milioni 360.

Miradi iliyotembelewa na Mkuu wa Mkoa ni pamoja na ujenzi wa shule ya wavulana ya Kanda ambayo inagharimu kiasi cha shilingi Bilioni 4.6 kupitia mpango wa kuboresha elimu (SEQUIP) na inatarajiwa kukamilika June 2025 ambapo mradi huo unalenga kutoa elimu kwa wanafunzi 960 wa kanda ya kati kwa ngazi ya O-level na A-level .

Ujenzi wa Bweni katika shule ya Sekondari Mrijo unaotekelezwa kwa fedha za Serikali kuu kupitia EP4R, mapato ya ndani na nguvu za wananchi ambapo unagharimu kiasi cha shilingi Milioni 214.4, Mradi wa ujenzi wa Hosteli katika shule ya Sekondari Jangalo unaogharimu kiasi cha Shilingi Milioni 144.4

Lengo la ujenzi wa Mabweni na Hosteli katika shule hizo ni kupatikana kwa elimu bora kwa wanafunzi wa Kata hizo, kupunguza changamoto za wanafunzi kutembea umbali mrefu kufika shuleni, kutoa nafasi ya elimu bora pamoja na kupunguza adha na madhila wanayopata hasa wasichana kutoka kwa vijana wa mtaani maarufu kama ‘maronjoo’.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu