SERIKALI YA AWAMU YA SITA IMETATUA KWA KIASI KIKUBWA KERO ZA WALIMU NCHINI

Imetumwa : October 18th, 2025

Na. Hellen M. Minja

       Habari – DODOMA RS

Kero mbalimbali za Walimu nchini ikiwemo kupandishwa vyeo na nyongeza ya mishahara, zimeendelea kutatuliwa kwa kiasi kikubwa na Serikali ya awamu ya sita inayoongozwa na Rais Mhe. Dkt. Samia Suluhu Hassan hali ambayo imeleta tija kwa maisha ya Walimu sambamba na uboreshaji wa miundombinu ya Utumishi.

Hayo yamebainishwa na Mkuu wa Mkoa wa Dodoma Mhe. Rosemary Senyamule wakati akizungumza na Viongozi wa Walimu kutoka Mikoa ya Kanda za Kati na Kaskazini  kwenye Mkutano Mkuu wa ujirani mwema unaofanyika kwenye ukumbi wa Klabu ya Kilimani Jijini hapa kwa siku mbili kuanzia leo Oktoba 18 hadi 19, 2025.

“Serikali ya awamu ya sita inayoongozwa na Mhe. Dkt Samia Suluhu Hassan, imeendelea kutatua kero za Walimu ikiwemo kupandishwa vyeo, nyongeza ya mshahara kila mwaka ambayo imeleta tija, kubadilishwa miundombinu ya Utumishi na kulipa madeni mbalimbali ikiwemo madeni ya likizo, matibabu, uhamisho, fedha za kufunga mizigo kwa Wastaafu.”

Aidha, Rais wa Chama cha Walimu Tanzania (CWT) Dkt. Suleiman Ikomba, amesema Uongozi mpya wa Chama hicho una matamanio ya Walimu kuonekana ni Kioo cha jamii hivyo, ndani ya miaka mitano ya uongozi wake, wapo tayari kushirikiana na Serikali na jamii nzima ya Tanzania ili kuiletea maendeleo nchi na kufikia matamanio hayo.

Katika Risala iliyosomwa na Mwalimu Asha Juma, viongozi hao wamependekeza Serikali kuepuka madeni ya Walimu yasiyo ya mishahara kwa kuingiza fedha za likizo moja kwa moja kwenye Akaunti  za Benki za wahusika sambamba na kuendelea kutoa mafunzo ya matumizi ya Mifumo ya Kiutumishi ili kutatua changamoto inayowakabili baadhi yao.

 Umoja wa Walimu wa Kanda ya Kati na Kaskazini unaojumuisha Walimu kutoka Mikoa sita ya Arusha, Dodoma, Tanga, Kilimanjaro, Manyara na Singida, ulianzishwa 2022 ukiwa na lengo la kuwaunganisha Walimu hao ili wabadilishane uzoefu na kutatua changamoto zinazowakabili ili kutekeleza kaulimbiu ya CWT ambayo ni “Wajibu na Haki”.

#DodomaFahariyaWatanzania

#KuraYakoHakiYakoJitokezeKupigakura

#NimejiandikishaNitapigaKura

#UmejiandikishaKapigeKura