DIRA 2050 YALENGA KUFIKIA UCHUMI WA KATI WA JUU WA DOLA TRILIONI MOJA NCHINI

Imetumwa : July 17th, 2025

Na. Hellen M. Minja

       Habari – DODOMA RS

Tume ya Taifa ya Mipango kwa kushirikiana na Ofisi ya Waziri Mkuu pamoja na Mpango wa muda mrefu unaoandaliwa, imeelekezwa kuandaa nyenzo zitakazotumika kupima matokeo ya utendeji Serikalini kwa kuzingatia malengo na Shabaha ya Dira 2050 inayolenga kufikia uchumi wa kati wa juu wa Dola Trilioni moja kabla ya kuanza kutumika kwa Dira hiyo.

Maelekezo hayo yametolewa na Rais wa Jamhuri ya Muungano wa Tanzania Mhe. Dkt. Samia Suluhu Hassan wakati wa hafla ya Uzindunzi wa Dira 2050 iliyofanyika Julai 17, 2025 kwenye ukumbi wa Kituo cha Mikutano  cha Jakaya Kikwete, Jijini Dodoma.

“Dira 2050 imeweka lengo na shabaha kubwa kufikia uchumi wa kati wa juu wa Dola Trilioni moja, ni wazi hatutaweza kufikia lengo hili kama tutaendelea kufanya kazi kimazoea, naelekeza Tume ya Mipango kwa kushirikiana na Ofisi ya Waziri Mkuu pamoja na Mpango unaoandaliwa, waweze kuandaa kwa haraka nyenzo zitakazotumika kupima utendaji Serikalini kwa kuzingatia malengo na shabaha za Dira hii kabla ya kuanza kutumika”.

Akizungumza kabla ya kumkaribisha Mhe. Rais, Makamu wa Rais Mhe. Dkt. Philip Mpango, amesema Dira ya Taifa inachochea matumaini na kuhamasisha Wananchi kuchukua hatua huku ikiongoza maamuzi ya kisera na hatimaye kuumba mwenendo wa maendeleo ya Nchi, hivyo kuunganisha nguvu za raia kuelekea katika malengo ya pamoja.

Kadhalika, Waziri wa Nchi, Ofisi ya Rais – Mipango na Uwekezaji Mhe. Prof. Kitila Mkumbo, ametaja malengo mahsusi ya Dira 2050 kuwa ni, Tanzania kufikia hadhi ya uchumi wa kipato cha kati ngazi ya juu ambayo kwa mujibu wa Benki ya Dunia, Pato la Taifa kwa mtu mmoja lina thamani ya Dola za Kimarekani kati ya 4,516 na 14,005.

Aidha, Katibu Mtendaji wa Tume ya Taifa ya Mipango Dkt. David Msemwa, amesema ukusanyaji wa maoni ya wananchi juu ya uundwaji wa Dira hiyo, ulifanikiwa kuwafikia Watanzania 1,174,000 waliotoa maoni ya ‘ana kwa ana’ huku waliotuma jumbe fupi kwa njia ya simu wakiwa zaidi ya 8000, Mitandao ya kijamii zaidi ya 100,000 kupitia Mikutano, Makongamano na Semina Watanzania zaidi ya 22,000 walishiriki.

Akitoa salamu za Mkoa, Mkuu wa Mkoa wa Dodoma Mhe. Rosemary Senyamule ametoa tathmini ya utekelezaji wa Mpango huo huku akimpongeza Mhe. Rais kwa kufanikisha yale yaliyokuwepo kwenye Mipango ya nyuma.

“Mpango huu ambao unakwenda kuuzindua leo, tayari unatuonesha mafanikio 60% ya utekelezaji wake, kazi tunayobaki nayo sasa ni 40% kwa kazi kubwa na nzuri ambayo umeifanya. Mhe. Rais umeonesha uzalendo mkubwa kwa kutekeleza mambo yaliyokuwepo na yaliyokua kwenye mipango ya miaka ya nyuma sana.”

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu