TAWLA - SAUTI YA WANAWAKE NA WATOTO WALIOKOSA ULINZI WA KISHERIA KATIKA JAMII

Imetumwa : May 3rd, 2025

Na. Hellen M. Minja,

       Habari - DODOMA RS

Chama cha Wanasheria Wanawake Tanzania, TAWLA, kimetajwa kuwa sauti ya Wanawake na watoto waliokosa ulinzi wa kisheria,ikiwa ni pamoja na kuchochea mabadiliko ya kisheria,kuondoa Sheria kandamizi zilizokua zinawakabili Wanawake na watoto ndani ya Jamii.

Hayo yamesemwa leo Mei 03, 2025 na Mkuu wa Mkoa wa Dodoma Mhe. Rosemary Senyamule wakati wa hafla fupi ya kusherehekea miaka 35 tangu kuanzishwa kwa Chama hicho iliyokwenda sambamba na uzinduzi wa jengo la ofisi yao Mkoani hapa lililopo eneo la Ilazo Jijini Dodoma.

"Natoa pongezi kwa kazi kubwa iliyofanywa na TAWLA ambapo mmekua sauti ya Wanawake na watoto waliokosa Ulinzi wa kisheria lakini pia mmechochea mabadiliko ya kisheria kwenye Sheria kandamizi, mmefanya tafiti zenye mchango mkubwa katika Sera, mmesaidia Wanawake, watoto na jamii kwa ujumla kupata elimu ya kisheria"  

Kadhalika, Mwenyekiti wa Bodi ya Wakurugenzi TAWLA Bi. Suzan Ndomba, amesema maendeleo ya Taifa hayawezi kufikiwa pasi na usawa wa kijinsia kwani Wanawake ni kiungo muhimu katika maendeleo, na nchi haiwezi kuendelea kama wasiposhirikishwa katika nyanja za Siasa, Uchumi, Elimu na Sheria.

Vile vile, Msajili wa Mabaraza ya Ardhi na Nyumba Wilaya Bi. Stella Tullo, ameongeza kuwa  miongoni mwa kesi wanazozipokea kwenye Mabaraza hayo ni za Wanawake hivyo, wanapopata Wanawake ambao hawana uwezo wa kulipia huduma za Wanasheria, TAWLA imekua msaada mkubwa kwa Wanawake hao wakati wote.

Akizungumzia namna walivyopata ofisi hiyo, Mkurugenzi Mtendaji wa TAWLA Bi. Tike Mwambipile, amesema awali walikua na eneo lililopitiwa na Mradi wa SGR hivyo walilipwa fidia ya Milioni 42 iliyowezesha kupata eneo jipya la sasa ambapo walijenga ofisi na kuhamia rasmi 2024 na waliona ni vyema kulizindua rasmi katika sherehe ya miaka 35 ya Chama hicho.

Maadhimisho ya miaka 35 ya TAWLA yamekwenda sambamba na kauli mbiu za "Miaka 35 ya Haki na usawa"  pamoja na "Haki haina jinsia" zote zikihamasisha na kutoa ujumbe kwamba utoaji haki hauchagui jinsia, kila mmoja ana haki sawa ya kupata msaada wa kisheria pindi anapouhitaji.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu