WAMILIKI WA MAABARA BINAFSI WATAKIWA KUTOA MAJIBU SAHIHI YA VIPIMO KWA WAGONJWA

Imetumwa : June 17th, 2025

Na. Hellen M. Minja

       Habari – DODOMA RS

Wamiliki wa Maabara binafsi Mkoa wa Dodoma, wametakiwa kutowalazimisha Wataalam wa Maabara kutoa majibu yasiyo sahihi ya vipimo vya magonjwa kwa dhana ya kuuza aina fulani ya dawa kutokana na kushinikiza kupima magonjwa kinyume na utaratibu.

Hayo yamesemwa na Katibu Tawala Mkoa wa Dodoma Bw. Kaspar K. Mmuya alipokua akifunga Mkutano kati ya ofisi ya Mkuu wa Mkoa, Wamiliki wa Maabara binafsi za afya na Wataalamu wa Maabara uliofanyika Juni 16, 2025 kwenye ukumbi wa ofisi ya Mkuu wa Mkoa wa Dodoma Jijini humu.

Akizungumza wakati wa kufunga Mkutano huo uliolenga kufanya tathmini ya utoaji huduma za Maabara ikiwemo uwasilishwaji wa changamoto wanazokutana nazo wataalam hao kwenye vituo vyao vya kazi, Bw. Mmuya alisema;

“Tusing’ang’anize wagonjwa kupima vitu ambavyo havipo kwenye utaratibu, Jingine, kutoa majibu ambayo yanapelekea dawa fulani iuzike, sisi tukiandikiwa dawa lazima tumeze kwa sababu tunataka tupone. Hii sio sawa, tusitoe majibu yasiyo sahihi ndio hoja yangu”.

Akifungua Mkutano huo, Mganga Mkuu wa Mkoa wa Dodoma Thomas Rutachunzibwa, amesema kuwa kwa takribani miaka miwili Mkoa wa Dodoma umeshuhudia maboresho makubwa katika sekta ya afya ambapo Serikali imewekeza takribani shilingi Bilioni 80.25 kwa upande wa miundombinu, vifaa tiba na dawa katika vituo vya kutolea huduma za afya.

Kadhalika, Msajili kutoka Bodi ya Maabara binafsi za Afya (PHLB) Bw. Dominic Fwiling’afu amewakumbusha Wataalam hao kuwa Sera na kauli mbiu ya Serikali kwa sasa ni ubora wa huduma kwani Serikali imefanya mengi lakini ubora wa huduma ni jukumu lao na wataalamu hao ambao ni Wadau muhimu wa sekta ya Afya.

Aidha, Msimamizi wa Huduma za Maabara Mkoa wa Dodoma Bw. Garadina Challe amesema wamiliki wa Maabara binafsi wanatakiwa kufahamu kuwa Maabara za Afya ni uti wa mgongo katika kutoa matibabu kwa wagonjwa,hivyo amewataka wazingatie mikataba na wataalam wao kulingana na miongozo sambamba na kulipa tozo za Serikali kwa wakati.

Hata hivyo, Afisa Ubora kutoka Bodi ya Maabara Binafsi za Afya Bw. Berzard Ngumbuchi, amesema katika kuboresha huduma za Maabara Binafsi za Afya, Sheria, Kanuni na Miongozo imezingatia utaratibu wa kusajili, kuratibu na kukagua ili kuhakikisha viwango vinatumika, kuzingatiwa na kuimarika wakati wote.

Mkutano huo wa siku moja, umeazimia mambo kadhaa ikiwemo upatikanaji wa mifuko ya damu (blood bag) katika vituo vya kutolea huduma za afya, upatikanaji wa vitendanishi vya kupimia ugonjwa wa Kifua Kikuu kwa njia ya Hadubini, kuhuisha taarifa za vituo kwenye Mfumo wa usajili wa kutolea huduma za afya na kuwasilisha orodha ya vituo vyote vya kutolea huduma za afya vilivyofungwa kwa Mratibu wa Mkoa.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu