BARABARA YA IRINGA JIJINI DODOMA MBIONI KUPANULIWA KUDHIBITI MSONGAMANO

Imetumwa : September 17th, 2025

Na. Hellen M. Minja

       Habari – DODOMA RS

Serikali ipo mbioni kufanya upanuzi wa Barabara ya Iringa inayopita kwenye Kituo cha Reli ya Kisasa ya mwendokasi (SGR) Mkoa wa Dodoma, Dkt. Samia Suluhu Hassan katika eneo la Mkonze Jijini hapa kwa lengo la kudhibiti kero ya msongamano wa magari, Bajaji na Pikipiki hali inayosababisha kadhia kwa watumiaji wa Barabara hiyo.

Mkuu wa Mkoa wa Dodoma Mhe. Rosemary Senyamule amebainisha hayo wakati akijibu kero iliyoibuliwa wakati wa Semina maalum iliyoandaliwa na Ofisi yake kwa lengo la kutoa elimu, kusikiliza na kutatua kero za Maafisa Usafirishaji wa Bajaji na Pikipiki (Bodaboda) wa Jiji la Dodoma iliyofanyika Septemba 17, 2025 katika Ukumbi wa Jengo la Safina.

Kero hiyo iliyoibuliwa na moja ya Maafisa hao akilalamikia msongamano mkubwa wa vyombo vya usafiri katika eneo hilo hali inayosababisha ajali mara kadhaa kutokana na uwepo wa Kituo hicho cha Reli ambacho kinapokea watu wanaoingia na kutoka kwa wingi Jijini hapa kutoka Mikoa ya Dar es Salaam na Morogoro.

“Barabara ya SGR inakwenda kutanuliwa na kuwa na njia nne badala ya mbili ambazo zipo sasa hivi ili kuepusha ajali zinazojitokeza mara chache katika eneo hilo pia kuondoa msongamano wa magari na vyombo vingine vya moto kutokana na uwepo wa Kituo cha reli hapo”. Amesema Mhe. Senyamule.

Aidha, Mkuu wa Wilaya ya Dodoma Mhe. Jabir Shekimweri alipokua akijibu kero ya vitendo vya ukiukwaji wa sheria barabarani wanavyodai kufanyiwa Maafisa hao, amesema Jiji lipo kwenye zoezi endelevu la ufungaji wa CCTV Kamera kwa usalama na zitasaidia kuondoa uovu unaodaiwa kwani matukio yote yataonekana kutokana na Mfumo huo kuwa wa wazi kwa wote.

Akiwasilisha mada juu ya mchango wa Maafisa usafirishaji (Bodaboda) kwenye usalama wa Mkoa, Mkuu wa usalama barabarani Mkoa wa Dodoma (RTO) Yusuph Kamote amesema Maafisa hao wamekua walinzi shirikishi madhubuti kwani wamekua wakitoa taarifa za uhalifu pindi zinapotokea na kusaidia Mamlaka husika kufika eneo husika kwa wakati.

Hata hivyo, Mwenyekiti wa Umoja wa Madereva Bajaji na Pikipiki Jiji la Dodoma (UMAPIDO) Bw. Chacha Marwa  ameishukuru  Serikali  kwa  kuendelea kuwapatia mafunzo,kuwashirikisha katika masuala mbalimbali pamoja na kutatua changamoto zao.

#dodomafahariyawatanzania

#wekezadodomastawishadodoma

#keroyakowajibuwangu