JIJI LA DODOMA KUNUFAIKA NA TEKNOLOJIA KUTOKA JAMHURI YA CZECH

Imetumwa : October 7th, 2025

Na. Hellen M. Minja

       Habari – DDOMA RS

Mkoa wa Dodoma unatarajia kunufaika na teknolojia kutoka Jamhuri ya Czech kutokana na ushirikiano baina na Mji wa Monrovian Kusini na Serikali ya Mkoa, kwenye sekta za kilimo cha zabibu sanjari na utengenezaji wa mvinyo, elimu, utalii na kubadilishana uwezo watumishi wa Mkoa wa Dodoma na wale wa Jamhuri hiyo.

Akizungumza na ujumbe kutoka Czech ulioongozwa na Mhandisi Roman Grolig ofisini kwake Jijini Dodoma leo Oktoba 07, 2025, Mkuu wa Mkoa wa Dodoma Mhe. Rosemary Senyamule amesema awali alifanya mazungumzo ya ushirikiano baina yao alipotembelea Jamhuri hiyo, hivyo amefarijika kuona wamemtembelea.

“Tulipokua Mji wa Monrovian tulizungumzia mambo ya ushirikiano ambayo ni vipaumbele vyetu ambavyo ni katika Kilimo cha Zabibu na kutengeneza Wine, Elimu hasa kwa upande wa tafiti na ufundi, utalii pamoja na kubadilishana uzoefu kwa watumishi wetu na wa Monrovian Kusini” Mhe. Senyamule.

Kadhalika, Mhandisi Roman Grolig amesema tayari wameandaa ziara kwa Watumishi wa Dodoma kutembelea Mji wa Monrovian Kusini na watashirikiana na Taasisi za kifedha za Jamhuri ya Czech kusafirisha teknolijia yao ambayo itatumika hapa Tanzania hususan Dodoma.

Sambamba na hilo, ameongeza kuwa nchi yake inakwenda kutia saini Makubaliano ya kwanza kati ya Czech na Wizara ya Uchukuzi ya Tanzania juu ya uwekaji wa mifumo ya umeme jua kwenye njia zinazopita treni ya kisasa ya mwendokasi (SGR) kwa lengo la kuboresha usafiri huo.

Aidha, ameongeza kuwa timu kutoka Czech itaanza kuingia Dodoma kuanzia Novemba 2025 kwa ajili ya kuangalia fursa za uwekezaji kulingana na vipaumbele na makubaliano ya kushirikiana walioyaweka.