DKT. KAZUNGU ATOA WITO KWA WADAU WA TAKWIMU KUZINGATIA USAHIHI

Imetumwa : October 7th, 2025

Na:Sofia Remmi.

Habari:Dodoma Rs

Katibu Tawala Mkoa wa Dodoma Dkt.Khatibu M.Kazungu ametoa wito kwa wadau wa Takwimu za Uchumi ngazi ya Halmashauri za Mkoa wa Dodoma kushiriki kwa dhati katika kuhakikisha taarifa na takwimu zinazoandaliwa ni sahihi na zinawasilishwa Benki  kuu ya Tanzania ili zitumike katika mambo mbalimbali ya kukuza uchumi wa nchi.

Wito huo umetolewa 07 Oktoba 2025, wakati akifungua kikao kazi Kati ya Benki kuu ya Tanzania na wadau wa Takwimu kutoka Mkoa wa Dodoma kuhusu upatikanaji wa ubora wa Takwimu.

Akizungumza katika kikao hicho Dkt.Kazungu Amesema takwimu zinazopelekwa benki kuu na kwa wadau ni zile zinazotumika katika kuandaa taarifa mbalimbali hivyo lazima ziwe sawa na hazikinzani.

“Hii itawezesha chambuzi zinazofanywa na Benki kuu kutoa matokeo sahihi na yanayokidhi matarajio ya wadau katika ngazi zote.

“Tathmini za mwenendo wa shughuli za kiuchumi katika kuandaa taarifa hutumika ndani na nje ya Benki kuu Ikiwemo katika Semina na mikutano ya wadau”Alisema Kazungu.

Aidha Meneja Msaidizi Uchumi na Takwimu Ndg. Shamy Chamicha amesema lengo la kikao hicho ni kuhamasisha wadau kuweka na kutekeleza mikakati ya kuhakikisha na kusimamia kuwepo kwa ubora wa takwimu.

Vilevile mada zilizowasilishwa na kujadiliwa Katika kikao hicho ni pamoja na majukumu ya Msingi ya Benki Kuu na namna yanavyohusiana na taarifa pamoja na takwimu zinazokusanywa, taarifa ya robo mwaka wa tathmini ya hali ya shughuli za kiuchumi katika kanda, takwimu zinazozalishwa kisekta, Kilimo, Mifugo, Mazao, uvuvi, Ushirika, misitu na mapato ya ndani ya Halmashauri.

Pia kikao kazi hicho kilihusisha wadau kutoka ngazi ya Mkoa na Halmashauri ambazo hushiriki katika kuandaa na kuipa Benki Kuu takwimu za kiuchumi.