BILLIONI 14 KUJENGA OFISI ZA UBALOZI WA UGANDA JIJINI DODOMA

Imetumwa : May 9th, 2025

Na. Sizah Kangalawe- Dodoma RS

Mkuu wa Mkoa wa Dodoma Mhe. Rosemary Senyamule Mei 09/ 2025 ameshiriki hafla ya uwekaji  jiwe la msingi ujenzi wa ofisi za ubalozi wa Uganda Nchini, zinazojengwa katika mji wa Serikali Mtumba Jijini Dodoma.

Akizungumza na washiriki wa hafla hiyo Senyamule ameweka bayana kuwa ujenzi wa ofisi za Mabalozi  Jijini Dodoma unatokana na uwepo wa miundombinu rafiki inayotekelezwa na Serikali ya awamu ya Sita Chini ya Rais Dkt. Samia Suluhu Hassan.

‘’Ni baraka kubwa kwetu kama Mkoa, kuona watu wameielewa Serikali  kuwa Dodoma ndio makao makuu, na wameamini hata wao wa ngazi za Ubalozi na diplomasia wanaweza kuishi Dodoma,hilo ni jambo la faraja kwetu.

"Hii yote inatokana na uwekezaji wa Serikali uliofanywa na Rais wetu ambaye amewekeza fedha nyingi, sio tu kwenye mji wa Serikali lakini huduma mbalimbali zinazowarahisishia kufika Dodoma, huduma  nzuri za afya pamoja na ujenzi wa Uwanja wa ndege wa kimataifa Msalato ambao utawawezesha mabalozi kutua Dodoma moja kwa moja kutoka nchi mbalimbali", amesema Senyamule

Kwa upande wake Balozi wa Uganda nchini Tanzania Mhe. Kanali Fred Mwesigye ameeleza kuwa ujenzi huo si tu  jengo la kuhudumia wananchi bali ni kituo muhimu cha kuimarisha na kukuza zaidi uhusiano wa kiuchumi na kidiplomasia baina ya Tanzania na Uganda.

 Aidha Balozi mwesigye amesema Uganda inaona fahari kutumia fursa hiyo kuwa nchi ya kwanza kuanzisha ujenzi wa Ofisi ya Ubalozi ikiwa ni sehemu ya kutoa shukrani zake kwa Serikali ya Tanzania kwa mchango iliyoutoa katika ujenzi wa Taifa la Uganda.

Hata hivyo RC Senyamule  ametumia fursa hiyo kuzihimiza Balozi zingine zilipo Nchini, kuhamishia ofisi zao Jijini Dodoma, kwa kuwa Serikali tayari imeshaweka mazingira rafiki na wezeshi ya kuwawezesha kutekeleza majukumu yao vyema wakiwa Jijini hapa.

ujenzi wa Ofisi za Ubalozi huo utagharimu zaidi ya billioni 14 za Kitanzania na unatarajiwa kukamilika ndani ya miaka miwili.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu