“VICOBA TUMIENI FURSA KWA KUFANYA BIASHARA NA SERIKALI “- RC SENYAMULE

Imetumwa : October 3rd, 2025

Na. Hellen M. Minja

       Habari – DODOMA RS

Vikundi vya huduma ndogo za kifedha vinavyopatikana katika Jiji la Dodoma (VICOBA), vimetakiwa kutumia fursa kufanya biashara na Serikali kupitia miradi mikubwa ya uwekezaji inayofanyika kwenye Makao Makuu ya nchi kwani thamani yao kwa Serikali ni kubwa.

Hayo yamebainishwa na Mkuu wa Mkoa wa Dodoma Mhe. Rosemary Senyamule alipokua akifunga kikao alichokiitisha kuzungumza na viongozi wa vikundi hivyo kwenye ukumbi wa Safina Jijini Dodoma Oktoba 03, 2025 juu ya kukua kiuchumi kwa kutumia fursa mbalimbali zinazopatikana hapa.

“VIKOBA mna thamani kubwa kwenye Serikali hii kwa sababu zipo fursa nyingi za kufanya biashara na Serikali lakini fursa hizi tutazipata tukichukua hatua. Nitoe Wito kwa Dodoma, tutumie fursa hizo kwani ofisi zetu zipo wazi kwa ajili yenu, wote mna haki ya kupata huduma kwenye ofisi za Serikali.”

Aidha, Mratibu Msaidizi wa Huduma ndogo za kifedha Halmashauri ya Jiji la Dodoma Bi. Farida Mayega amesema Jiji linatekeleza usajili wa huduma ndogo za kifedha kwa mujibu wa Sheria iliyopitishwa mwaka 2018 ambayo inalenga kulinda watumiaji wa huduma hiyo pindi wanaposajili vikundi vyao na kutambulika rasmi.

Akitoa mada kuhusu Mikopo kwa wanavikundi hao wa VIKOBA, Afisa kutoka Benki kuu yaTanzania Bw. Fanuel Kijoji, amewaasa wanavikundi kuweka akiba ya fedha ili kuepuka mikopo isiyo ya lazima ambayo wakati mwingine haipelekwi kwenye uzalishaji hali inayowaumiza kiuchumi.

Jiji la Dodoma lina vikundi vya VICOBA 351 vilivyosajiliwa vikiwa na wanaume 568 na wanawake 4,010, takribani vikundi 191 vimesajiliwa kwenye robo ya mwaka huu na usajili wake huanzia ngazi ya Kata kupitia Afisa Ustawi wa Jamii huku wanakikundi wakinufaika kushiriki kwenye fursa mbalimbali zinazotolewa na Serikali kupitia Taasisi zake.

#dodomafahariyawatanzania

#keroyakowajibuwangu

#nimejiandikishanitapigakura