HALMASHAURI ZA MKOA WA DODOMA ZAPOKEA VIFAA VYA USAMBAZAJI CHANJO

Imetumwa : January 10th, 2025

Na. Hellen M. Minja,

      Habari – DODOMA RS

Katika juhudi za kuendelea kuimarisha sekta ya huduma za afya Nchini, Serikali ya Tanzania imetoa gari moja na pikipiki 13 kwa sekta hiyo Mkoa wa Dodoma zitakazotumika katika usambazaji wa chanjo ambazo zimekabidhiwa leo Januari 10, 2025 kwa Wakuu wa Wilaya za Mkoa huu.

Hafla ya kukabidhi gari na pikipiki hizo imefanywa na   Mkuu wa Mkoa wa Dodoma Mhe. Rosemary Senyamule katika viwanja vya ofisi yake jengo la Mkapa Jijini Dodoma ambapo amesisitiza kuwa dhamira ya Rais ni Watanzania wapate huduma bora.

“Mhe. Rais anayo dhamira ya kuona Watanzania wanapata huduma bora za afya. Vifaa hivi tuendelee kuvitumia kwa utashi mkubwa kuhakikisha Wanadodoma wanafurahia huduma tunazowapa sisi watumishi wa sekta ya afya kwani gari hili na pikipiki zitasaidia kufikisha vifaa haraka” Mhe. Senyamule.

Awali, Mganga Mkuu wa Mkoa wa Dodoma Dr. Thomas Rutachunzibwa, aliainisha mgawanyo wa vifaa hivyo kwa Halmashauri zote 8 za Mkoa wa Dodoma ambapo Bahi imepata pikipiki 1, Chamwino 2 kwenye Kituo cha Itiso, Chemba pikipiki 2 kwenye Zahanati ya Laboda, Dodoma Jiji imepata gari moja, Kondoa DC pikipiki 2 kwenye Zahanati ya Chololo, Kondoa Mji pikipiki 1, Kongwa pikipiki 2 kwenye Kituo cha Afya Chitego na Mpwapwa imepata pikipiki 2 kwenye kituo cha Chipogolo.

Nae, Mratibu wa huduma za chanjo Mkoa wa Dodoma Bw. Francis Bujiku, amesema kuwa gari na pikipiki hizo vitakwenda kuboresha huduma za chanjo kwa Mkoa wa Dodoma na kurahisisha ufuatiliaji wa magonjwa yanayozuilika kwa chanjo ambapo awali ilikua vigumu kuwafikia wananchi wanaoishi maeneo ya pembezoni.

Mwezi Desemba, Ofisi ya Mkuu wa Mkoa wa Dodoma, ilipokea taarifa kutoka Ofisi ya Rais TAMISEMI kuhusu mgao wa Gari moja na pikipiki 13 kwa Halmashauri kwa ajili ya usimamizi wa huduma za chanjo ambapo vifaa hivyo vilinunuliwa na Wizara ya Afya chini ya ufadhili wa shirika la GAVI.

#dodomafahariyawatanzania                                                    

#keroyakowajibuwangu                                                                          

#mtiwangubirthdayyangu