‘iMES’ KUTATUA CHANGAMOTO YA UPATIKANAJI WA TAARIFA ZA KADA YA MAENDELEO YA JAMII MKOA WA DODOMA

Imetumwa : June 6th, 2025

Na. Hellen M. Minja,

        Habari - DODOMA RS

Ofisi ya Rais TAMISEMI imetoa mafunzo ya matumizi ya Mfumo wa iMES kwa Maafisa Maendeleo ya Jamii wa ngazi zote za Mkoa wa Dodoma wenye lengo la kutatua kadhia ya ukusanyaji, uwasilishaji na upatikanaji wa taarifa za sekta hiyo zinazosaidia katika kufanya mipango, bajeti na maamuzi kwa ngazi mbalimbali.

Hayo yamebainishwa na Afisa Maendeleo ya Jamii kutoka Ofisi ya Rais TAMISEMI Bw. Jeremiah Mwambange, alipokua akitoa mafunzo juu ya matumizi ya Mfumo huo kwenye kikao kazi kilichohusisha Maafisa Maendeleo ya Jamii kutoka Halmashauri 8 za Mkoa wa Dodoma kilichofanyika katika ukumbi wa Ofisi ya Mkuu wa Mkoa wa Dodoma Juni 6, 2025.

"TAMISEMI imeona ni vizuri tutumie Mfumo wa iMES ili tuweze kukusanya taarifa na kuziingiza kwenye Mfumo ambao utasaidia ku 'control' changamoto ya kujirudia na ucheleweshaji wa taarifa kutoka katika ngazi za Kata, Halmashauri na Mkoa, hatimaye kufika kwa watumiaji kwa wakati. Taarifa hizi zinawezesha kupanga mipango, bajeti na maamuzi katika ngazi mbalimbali".

Kadhalika, Afisa Maendeleo ya Jamii Mkoa wa Dodoma Bi. Honorata Rwegasira ambaye pia ni mmoja kati ya Maafisa wanaopatiwa mafunzo hayo, ametaja faida za matumizi ya Mfumo huo kuwa utawasaidia kuingiza taarifa zao za kisekta na endapo mtu akihitaji taarifa, pia itarahisisha kwa kuingia kwenye Mfumo na kuipata kwa urahisi na kwa wakati.

Awali, katika ukusanyaji na upatikanaji wa taarifa mbalimbali za viashiria vya utekelezaji wa shughuli za Maendeleo ya Jamii, wamekua wakitumia njia ya 'word' na 'excel' kupata taarifa mbalimbali jambo ambalo limesababisha changamoto ya ubora wa taarifa kutokana na taarifa hizo wakati mwingine kutofautiana kutoka kipindi cha robo moja hadi nyingine.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu