JAFO AZINDUA WIKI YA MAZINGIRA

Imetumwa : June 1st, 2023

Waziri wa Nchi, Ofisi ya Makamu wa Rais (Muungano na Mazingira) Mhe. Dkt. Selemani Jafo amezindua wiki ya maadhimisho ya Mazingira Duniani yanayoanza kuadhimishwa tarehe 01/06/2023 hadi tarehe 05/06/2023 siku ya kilele Duniani kote.

Uzinduzi huo umefanyika mapema hii leo 01/06/2023 katika viwanja vya Shule ya Sekondari Kiwanja cha Ndege ambapo awali zoezi la usafi wa barabara na mitaro ya maji ya mvua umefanyika kuanzia katika Barabara ya NAM hotel hadi katika viwanja vya Shule hiyo ambapo Mhe. Dkt. Jafo na Mhe. Senyamule Mkuu wa Mkoa wa Dodoma na wadau mbalimbali wa mazingira walipata fursa ya kupanda miti shuleni hapo.

"Mkoa wa Dodoma umepewa nafasi ya kipekee ya kupanda miti millioni 40 ukilinganisha na Mikoa Mingine, Zoezi la siku ya Mazingira Duniani ilianzia nchini Sweden baada ya kuona uharibifu wa mazingira unaendelea kwahiyo ilitengwa siku maalum ili kuwakumbusha watu kutunza na kuyahifadhi Mazingira.

"Sherehe za Mazingira za Mwaka huu zinafanyika kitofauti kwasababu hatuna mpango wa kuadhimisha siku ya Mazingira ukumbini, Ila tutafanya kwa vitendo kwa kufanya usafi na kupanda miti katika mitaa mbalimbali ya Nchi yetu na siku ya kilele makamu wa Rais Dkt. Phillip Mpango atafanya Usafi na wanaDodoma katika maeneo ya Makulu hadi Chimwaga kilipo chuo Kikuu cha Dodoma", Amesisitiza Dkt. Jafo

Kwa upande wake Mkuu wa Mkoa wa Dodoma Mhe. Rosemary Senyamule ameishukuru Ofisi ya Makamu wa Rais (Muungano na Mazingira) kwa kuendelea kushirikiana vizuri na Ofisi ya Mkoa huo katika kutekeleza azma ya Serikali ya kukijanisha Dodoma

"Kipekee niwashukuru Ofisi ya Makamu wa Rais tumekuwa tukisema mara nyingi Dodoma imekuwa ikipewa kipaumbele katika sekta mbalimbali lakini nguvu kubwa imewekwa pia katika utunzaji wa mazingira tangu Mhe.Rais Samia alipokuwa Makamu wa Rais alilifanya zoezi hili kwa ukubwa tunamshukuru sana kwasababu hata wasaidizi wake mmekuwa mstari wa mbele kulitekeleza hili.

"Mlitoa maelekezo ya kupanda miti katika vyanzo vya maji na tumefanya hivyo katika bonde la Mzakwe na miti Ile inaendelea vizuri pia katika kuendeleza kampeni ya soma na mti na tumekwisha fanikiwa kupanda miti katika Shule zote za Msingi na Sekondari za Mkoa wetu. Katika kipengele cha kuzuia mifuko ya plastiki tumekuwa tukishiirikiana na NEMC na hadi sasa tumefanikiwa kuiondoa sokoni na tunashirikiana vizuri na Mikoa jirani katika kulitekeza Jambo hilo", Amesema Senyamule

Kilele cha siku ya Mazingira Duniani kinatarajiwa kufanyika Juni 5 mwaka huu ambapo kitaifa yataadhimishwa katika Jiji la Dodoma na Mgeni Rasmi anatarajiwa kuwa Makamu wa Rais wa Jamhuri ya Muungano wa Tanzania Mhe. Dkt. Phillip Mpango huku yakiwa na kaulimbiu ya "Pinga Uchafuzi wa Mazingira Unaotokana na Taka za Plastiki" na maadhimisho ya siku hiyo Kidunia yanatarajiwa kufanyika nchini Ivory coast.