WADAU WAASWA KUSHIRIKIANA NA SERIKALI KUJENGA JAMII DHIDI YA MAJANGA

Imetumwa : August 19th, 2025

Na. Bilali A. Juma

Habari – DODOMA RS

Mashirika ya misaada ya kibinadamu Duniani yameshauriwa kuweka mfumo endelevu wa utoaji huduma kwa kujenga ustahimilivu wa kukabiliana na majanga mbalimbali yanayojikeza.

Kauli hiyo imetolewa na Waziri wa Nchi, Ofisi ya Waziri Mkuu (Sera, Bunge na Uratibu), Mhe. William Lukuvi, aliyemuwakilisha Mgeni Rasmi Waziri Mkuu, Mhe. Kassim Majaliwa, katika maadhimisho ya Siku ya Watoa Misaada ya Kibinadamu Duniani yaliyofanyika Agosti 19, 2025, kwenye Ukumbi wa Mabele Jijini Dodoma.

" Katika kukabiliana na majanga mbalimbali Serikali kwa kushirikiana na wadau wa maendeleo, mashirika ya misaada ya kibinadamu, taasisi na mashirika yasiyo ya Kiserikali huratibu juhudi mbalimbali za kuokoa maisha na mali za wananchi.  Hatua hizo huhusisha utoaji wa chakula na malazi ya muda, huduma za afya pamoja na msaada wa kisaikolojia na kijamii".

Aidha Mhe. Lukuvi  amebainisha hatua za haraka zinazochukuliwa na Serikali katika kuhakikisha inarudisha mazingira yaliyoathirika katika hali yake ya awali.

"Serikali huchukua jitihada za haraka za kurudisha miundombinu iliyoharibiwa ili kuwawezesha wananchi kurejea katika hali ya kawaida mapema iwezekanavyo, uzoefu huo umethibitisha umuhimu wa kuwa na mifumo thabiti ya ushirikiano kati ya Serikali, sekta binafsi na jamii kwa ujumla.

Vile vile umeonyesha haja ya kuimarisha mifumo ya tahadhari ya mapema na kujenga uwezo wa jamii kustahimili madhara kabla majanga hayajatokea, " amesema Mhe. Lukuvi

Kwa upande wake, Naibu Waziri wa Nchi, Ofisi ya Waziri Mkuu, Sera, Bunge na Uratibu, Mhe. Ummy Nderiananga, aliwataka wadau kushirikiana kwa karibu zaidi katika kukabiliana na majanga, akibainisha kuwa mshikamano ni msingi wa usalama wa wananchi.

Naye  Mkuu wa Mkoa wa Dodoma, Mhe. Rosemary S. Senyamule, alitumia nafasi hiyo kumpongeza Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kudumisha amani na utulivu Nchini, hali inayowawezesha wananchi kufanya kazi kwa usalama na utulivu.

Maadhimisho hayo yenye kaulimbiu: “Kuimarisha utoaji wa huduma za kibinadamu na ustahimilivu dhidi ya majanga” yameandaliwa na Ofisi ya Waziri Mkuu kwa kushirikiana na DINGONET, ambapo yalisisitiza pia  umuhimu wa amani na mshikamano Duniani.

Maadhimisho hayo huadhimishwa kila Agosti 19 ikiwa ni kumbukizi ya wafanyakazi 22 wa misaada ya kibinadamu, waliofariki kwa mlipuko wa  bomu uliotokea katika hoteli ya Canal huko Baghdad, Iraq.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu