JAMII YAPIGWA MARUFUKU KUTUMIA WATU WENYE ULEMAVU KAMA KITEGA UCHUMI

Imetumwa : December 6th, 2024

Na; Happiness E. Chindiye

Habari - Bahi DC

Katibu tawala Wilaya ya Bahi Bi. Sara Ngalingasa amepiga marufuku baadhi ya watu ambao wanawatumia Watu Wenye Ulemavu kuwa sehemu ya kujipatia kipato kwa kuwazungusha mitaani kufanya kazi ya kuomba omba.

Bi.Ngalingasi  ametoa kauli hiyo leo Disemba 06,2024 wakati akihutubia kwa niaba ya Mkuu wa Mkoa wa Dodoma  kwenye  maadhimisho ya Kimkoa ya Siku ya Watu Wenye Ulemavu yaliyotanguliwa na kongamano lililojumuisha washiriki  kutoka Muungano wa Vyama vya Watu Wenye Ulemavu SHIVIWATA yaliyofanyika Wilayani  Bahi.

"Jamii inatakiwa kutambua wazi kuwa ulemavu siyo kuwa masikini au kuondolewa utu wa mtu bali Mtu Mwenye Ulemavu anatakiwa kuthaminiwa na kupewa haki yake kama alivyo mtu mwingine.

Tumeshuhudia baadhi ya wazazi au walezi wakiwatumia watoto wenye ulemavu vibaya badala ya kuwapatia haki yao ya msingi kama vile kuwapeleka shule, wao wamekuwa wakiwatumia vibaya kwa kuwazungusha mitaani  kuombaomba jambo ambalo si sahihi kulifanya.

Lazima tutambue kuwa watu wote wenye ulemavu wanatakiwa kupata haki zao za msingi na ulemavu siyo tiketi kuwa mnyonge au kunyanyapaliwa au kujinyanyapaa"ameeleza Ngalingasi.

Kwa upande wa uongozi wa SHIVIWATA Mkoa wa Dodoma wameishukuru Serikali ya Mkoa huu kwa kuendelea kuwatambua Watu Wenye Ulemavu na kuwapa kipaumbele katika kuwapatia huduma.

“Tunaishukuru Serikali ya Mkoa wetu wa Dodoma imeendelea kuwatambua Watu Wenye Ulemavu na kuwapatia huduma

mbalimbali ikiwa ni pamoja na msaada wa kisaikolojia na kijamii, vifaa saidizi

kama vile fimbo nyeupe, miwani kwa wenye uoni hafifu, viti mwendo, baiskeli za magurudumu matatu na magongo ili kuwawezesha kumudu mazingira yao.

Mchanganuo wa huduma zilizotolewa na idadi ya vifaa ndani ya Mwaka huu ni Miwani 109, fimbo nyeupe 70, miamvuli 84, mafuta maalum ya kukinga mionzi ya jua 857, kofia za kukinga na jua 196, baiskeli za magurudumu matatu 32.

“Watu wenye ulemavu 2,061 walipatiwa huduma ya msaada wa kisaikolojia na kijamii na 1,693 walipatiwa huduma za matibabu kwa msamaha. kwa mwaka 2024/2025 Halmashauri 5 zilitenga kiasi cha sh. 19,090,000/- kwa ajili ya huduma kwa Watu Wenye Ulemavu.”- wameeleza Viongozi wa SHIVYAWATA

 Kauli mbiu ya Maadhimisho ya mwaka huu ni “Kukuza Uongozi wa Watu Wenye Ulemavu kwa Ajili ya Mustakabali

Jumuishi na Endelevu”.

&&&

#mtiwangubirthdayyangu

#dodomafahariyawatanzania