KIWANDA CHA MVINYO KUFUFUA MATUMAINI YA WAKULIMA WA ZABIBU DODOMA

Imetumwa : October 8th, 2025

Na. Sizah Kangalawe

Habari- Dodoma Rs

Mkuu wa Mkoa wa Dodoma, Mhe. Rosemary Senyamule, amepongeza Jiji la Dodoma kwa ubunifu katika utekelezaji wa maelekezo ya Serikali kuhusu uendelezaji wa  zao la zabibu na uzalishaji wa mvinyo Jijini humo.

Akizungumza wakati wa ziara yake katika eneo la Hombolo kilipo kiwanda cha zabibu kinachomilikiwa na Halmashauri ya Jiji la Dodoma, Mhe. Senyamule alisema

"Leo ninayo furaha kubwa na nimpongeze Mkurugenzi wa Jiji na wilaya yote ya Dodoma, kwanza kwa kutekeleza maelekezo lakini mmetekeleza kwa ubunifu,  kwa kuboresha mambo zaidi.

"Mkoa wa Dodoma tunazungumzia utalii wa zabibu na ambao wakati wote tumetamani tuwe na maeneo maalum ambayo wakija Watalii watapata mahali kwa kujifunza 'value chain' yote ya zabibu hatua kwa hatua na hapa patakuwa mahali sahihi." alielezea Senyamule

Mhe. Senyamule aliongeza kuwa mradi huo utakuwa wa mfano wa kuigwa Nchini, na utasaidia wakulima wengine kujifunza mbinu bora za kilimo na uchakataji wa bidhaa za zabibu.

"Nisisitize kuwa hiki tunachokwenda kukifanya ni lazima kifanyike kama jambo la Mfano, jambo ambalo wakulima wengine watakuja kujifunza, raia watakuja kuchukua uzoefu, kwa hiyo sisi tufanye kitu ambacho kimebobea na kina utaalamu wa kutosha. Nafurahi kuwa wataalam wenu wameshakwenda Afrika Kusini kujifunza vitu mbalimbali, kwa hiyo naamini tutapata kitu kitu kizuri.Vijana wanasema kitu  'amazing'." Alisisitiza Senyamule

Kwa upande wake, Mkurugenzi wa Jiji la Dodoma Dkt. Fredrick Sagamiko aliweka bayana kuwa  kwasasa kiwanda hicho kipo kwenye matengenezo na kipo mbioni kuanza uzalishaji.

"Jiji la Dodoma lilikuwa limempatia mpangaji aliyekuwa anajulikana kama CETAWICO ambaye alikuwa anafanya shughuli za uchakataji na uzalishaji wa mvinyo, kwa hiyo kwa sasa kinachoendelea hapa ni ukarabati mdogo na usimikaji wa mitambo.

Hali ilivyo  sasa baada ya hicho kiwanda kufungwa, kwa ukanda huu wa Hombolo ambao ndio wazalishaji wakubwa wa zabibu, wameathirika kwa kiasi kikubwa sana kwenye upatikanaji wa masoko, kwa hiyo utekelezaji huu utaondoa hiyo changamoto na tutaharakisha msimu ujao tutakutana nao ili tuwe tayari kuanza uzalishaji wa 'wine'." alisema Dkt. Sagamiko.

Kiwanda hicho, mara kitakapoanza kazi rasmi, kinatarajiwa  kuzalisha hadi lita milioni 1.5 za mvinyo kwa mwaka, kiwango ambacho kitachochea kwa kiasi kikubwa uchumi wa ndani kupitia ajira, soko la zabibu na mapato ya Serikali.

Mradi huo unaweza kuwa kichocheo muhimu cha maendeleo Nchini, na kuifanya Dodoma kuwa kitovu cha utalii wa zabibu Afrika Mashariki na kati.